СЕНДА ҲАЁЛИМ
Эшигинг зулфига гуллар қистирдим,
Зулфингга қистирган гуллар мисоли,
Кўргин, қўлга ол, ҳидла, ўйла жим...
Шу гуллар қўлингда, сенда хаёлим.
Эшигинг бандини тутса бармоғинг,
Юрагим бандини тутгандек бир ҳис,
Биламан, висолга қийин келмоғинг,
Гуллар мени сенга эслатса, ёлғиз...
Бандидан тутгин, бахтлар тилагин,
Биздек ошиқларнинг барчаларига,
Силасин бармоғинг, нозик гулбаргин,
Лабларингни босгин гулчаларига...
Изҳордек ифорни туйсин дилларинг,
Табассум қилган кулгучларга боқ,
Сенга юрагимдек ушбу гулларим,
Тунлари бўлсинлар йўлингда чироқ...
Эшигинг зулфига қистирдим Гуллар...
На гулки, Сен учун гуллар туйғулар..