Маня” ӈарка ява’ – Россия. Маня” мал” яханана’ иленаӈэ, ява’ мэнева. Россия ӈани сямян яхат ӈарка, сямянхат мэбе”ӈа. Тюкы ява’ соя”ма ява’, тюкохона илева”, нюна” иле”. Маӈгты” иры’ 12 яляхана Россия’ соя”ма яляда. Тикы’ няю” Сеяха’ хардахана хуркари” мероприятия” ӈаць. Теда’ вадетына”
Теда’ мэта Россия’ соя”ма яля 33 по’ тяхана ӈадимы. Тамаляӈгана маӈгты” иры’ 1990 похона падарм’ падвы” «Декларация о государственном суверенитете России». Тад тикы яля’ пуд я’ сяр” ниня несэй страна ӈадимы – Россия. Маня” яханана хуркари ненэцяи” тэнз иле”. Ӈокхандо’ 190 ненэця’ тэнз. Хусувэнд харта вадада, харта иланда серма. Тикы’ поӈгана 47 техэ паӈгхадандо’ яханандо’ илена”. Тикы’ поӈгана ненэй ненэцяӈэ маня”.
– Маня” якоцява’ ханява” мэне”. Я’ сяр” ниня маня” яна’ то”олха нив’ юӈгу. Ханяри’ тэвад, мякваханд таминд харбилаӈгун. Манэ”мы ями’ ӈокахав ниӈа, Россия ями’, Ямал ями’ мэнев. Мань Саля’ хардахана теда’ иледм’. Сеяха’ хардами’ нив’ юрыбю”. Вадё”ма ями’. Мядоманзь турӈадамсь, нини’ манэӈадм’. Ӈарка яна’ тер” сензда’ ӈада”, савовна иледа”, – Сергей Салиндер мяканда хэбянда нерцю’ тарця сян вадам’ хэтась.
Маӈгты” иры’ 11 яляхана Россия’ соя”ма яля’ няю” СОК «Айсбергхана» Сёяха’ тер” сянакованзь ма”лыць. Не”, хасава” команда ма”лавыць, стритболхана пирдырӈаць. Не” няхар” командадонсь: «Ямалочка», «Сеяха», «А.К.С.». Яля’ ерь’ пуняю” сянако пэйдаць. Хасава” тет командам’ ма”лавыць: «Айсберг», «Ямал», «Пожарная часть», «Учитель». Ӈобт” ма”лёвы” нина” варемдо’ мэ” ӈаць, ихид мерець сюрберӈаць.
– Тюкы яля’ не” харто’ помнандо’ сянакуць, хасава” ӈани’ харто’’ помнадо сянакуць. Стритбол баскетболхад яӈга. Правилада несэйрка’. Сянакода няхар” ненэць, ӈопойдо’ ӈамды. Сянакода” ӈопой период’ сянаку” 10 минута’. Ӈани’ ӈоб’ яӈгня правилада – стритболхана ӈопойри кольцом’ сянако мэ”на”. Сёяха’ тер” сянакобто’ савовна сянакуць, ниць поёмбю”, – Руслан Яптик ваде”ӈада, пыда СОК «Айсберг»’ манзрана.
Не” поӈгана няхатато’ сянако ва”лёй «АКС» команда ӈэвы, тикы нянда пуд «Сеяха», няхаромдэй местам’ «Ямалочка» ханада. Хасава поӈгана сянако ва”лёй ӈацекы тохоламбди’ команда «Учитель» ӈэвы, нябимдей местам’ «Айсберг» ханада, няхаромдэйӈэ «Ямал» команда хаясь.
– Стритбол’ пуд ӈани’ ӈоб’ сянаковам’ мэӈаваць. Луца’ вадавна хэта соревнования по штрафным броскам. Сянаковы” ненэця” мал” харвана” мал” моётаць. Ханяӈэдо’ ӈопой минутахана кольцон’ няхатата ӈокавна мячм’ моись. Хасава” поӈгат нани няхатата ӈокавна Раис Хабибулин модась – 24 ӈопой минутахана, не” поӈгат Пуйне Тусида. Пыда 12 мячм’ ӈопой минута’ ямбан’ кольцон’ ха”аврась. Сёяха’ тер” нини’ хэбидя яля’ няю” сейхад вади хэтангудм’. Сензда ӈада”, ӈацекыда’ вадабида”, спортхана сянакуда”, нёда’ поёмбю”, ил’ сава ӈэя! – Руслан Андреевич тарем’ ваде”ӈадась.
Маӈгты” иры’ 12 яляхана Россия яна’ соя”ма яляхана Сеяха’ хардахана мерця ӈули я”авлысь. Тарця сата мерця яв’ няд миӈась. Ёльце тицись. Дом культуры’ манзрана” хэбидя яля’ няю” хуркари конкурс хамедавыць. Тикыдо’ мяд’ мюня мэ”эйдонсь. Теда’ серокоту’ сер” ваде”тына”. Мероприятия’ нюмда «Страна моих отцов».
Ӈодь Дом культуры’ мят’ тюсь, нё’ сихиня батут нусь. Тикахана нюдяко ӈацекэця санарӈаць. Пыдо’ нянандо’ тарем’ санарма ёльце маябцо. Сеяха’ хардахана тарця сянако юӈгу, ӈадъбята ӈацекэхэ”на манэсацьда ӈамгэри. Ӈарка хардаха’ тэвортахав’ хуркари сянако манэпи”, тюкохона ӈояк’. Тикы’ хэвхана сидя ябцнана нехэ’ нуӈахансь. Пыди’ пи’ ямбан’ лескы сертабавэхэ’. Хэбидя яляхана тикыди’ мирдапидинзь. Сертавы лескыди’ хуркариць: молокасавэй булочка”, сосикасавэй’, пиццам’ нюбета ӈавар, тэри булочка”. Тикы’ хавна хусувэй харвана сяйм’, кофем’, емзъдей ӈодя’ идм’ тэмдабиць.
– Россия яна’ соя”ма яля тецьда яляӈэ еремя. Пихина сянакоб’ тамна савараха ӈэӈгусь. Теда’ мяд’ мюня ӈобтарем’ саво. Мань етя тодамсь. Ӈацекыни’ ёльце сянаку”. Хуркари сянакубц” танявы”, ёльце сава. Маня” клубана’ манзрана” етри’ хуркари мероприятия сертабасеты”, ихиня тэри сава, маябцо. Хуркари посабтавы” ӈамгэри”: батут, нябихив’ нюмда ӈамгэ ӈэдакы. Тикахана кольцо таня, тикан’ шарик моёпа тара. Тикы’ хавна мюняд инд миӈа, тикы мерця’ инд’ шарим’ тю”уна ня”амбида. Тэри мэкад. Сянакованзь товы ненэць мале ӈока, сава, – Олеся ма, пыда Сеяха’ тер”.
Клуб’ тамна мюнякуна ӈани’ хуркари” ӈамгэ танявыць. Дом культуры’ манзрана” ненэцяи сянакултабиць. Сюрмба нертеӈгурӈаць, икня нерако пэ тердембвыць, хонаркодаха’ лаханаць, транаха’ сырӈаць, сё мэтаха’ инзелець. Тамна тикы’ хавна падтаӈгода таняць. Россия яна’ флаг’ тэнз сят’ сертабидонзь: тю”уна сэр”, ерьня сюнраха, ӈылняна няръяна. Хэбяда яляхана мэвы” няби пайдыдо’ падтавы’ ӈэвыць. Харад’ няби малхана ӈэбто пэрцяӈгна маторана” танявыць. Тикыд сянакованзь товы ненэцяи” е”эмня мастер-классм’ хамедавы”. Ӈуда лембям’ падар” ни’ тильтехэя енахалтада. Тад пуна ӈэбто пэрцяӈгана паркада. Хусувэй хибя няхар” тарцям’ серта, Россия’ флаг’ тэнзувна.
Россия яна’ соя”ма яля – ӈарка сава яля. Хусувэй хибя соя”ма ямда, вадё”ма ямда мэнеда. Ненэ” хусувэй яля’ ваде”мя’ мян ниӈа. Тикы’ еквавна иле яхананда ненэць сава серм’ сертаӈгу, манзраӈгу, тикар” ӈули” сава, маябцо. Россияхана илева маня” нянана луца’ вадавна хэта – гордость, лэмбарамд сидняку мэхэя ядаӈгу”нив. Ямал ява’, Россия ява маня” мэнева”, сяӈава”.
Антонина Серасхова