Камал театры артисты Раил Шәмсуаров һәм театрда диктор-тәрҗемәче, «ТНВ»каналындагы «Манзара» тапшыруы алып баручысы Зөлфия Шәмсуарова өченче тапкыр әти-әни булган. Шәмсуаровлар гаиләсендә Нәфисә исемле кыз һәм Әсфәндияр исемле малай үсеп килә инде. Гаиләгә тагын да ямь өстәп, бүген дөньяга тагын бер кечкенә егет аваз салган.
«Бер үлчәүгә дә сыймаслык кадерле мизгелләр. Тагын бер балабыз – улыбыз туды. «Күп балалы әти-әни» исемен йөртергә насыйп булды. Әлһәмдүлилләһ. Кояш кебек Шәмсуарның нурлары дөньяны тагын да яктыртсын», – дип яза Зөлфия үзләренең «Шәмсуаровлар гаиләсе» дигән сәхифәләрендә.
«Без бу серне 9 ай сакладык. «Манзараны» өчәү алып бардык», – дип, Зөлфия эш урынында төшкән шаян фотосын да күрсәткән.
«Гаиләгезне тагын бер нур өстәлү белән котлыйбыз. Бәхетле сабый булсын», «Исән-сау үстерергә язсын, бәхетле бала булсын», «Төкле аягың белән, нарасый! Сау-сәламәт һәм бәхетле булыгыз. Сәламәтлек, тигезлек, бәрәкәт телим», – дип, матур теләкләрен юллый аларга дуслары.