Негізгі статистикалық және тактикалық терминдер

Статистикалық терминдер:

xG (expected goals) – команда не ойыншы матчта қанша гол соғарлық мүмкіндік иеленгенін сипаттайтын көрсеткіш.

Бұл ойында МЮ 4 голдан аса соғарлық мүмкіндік жасаса да, тек 2 гол ғана соқты.

xA (expected assists) – команда немесе ойыншы неше нәтижелі пас беру керектігін көрсететін статистика.

NPxg (non-penalty expected goals) – пенальти және автоголсыз xG көрсеткіші.

xGA (expected goals against) – қарсылас команданың xG көрсеткіші.

xPTS (expected points) – команданың турнирде қанша ұпай алу керектігін xG және xGA негізінде есептейтін статистика.

xPTS көрсеткіші команданың қазіргі турнирлік кестедегі орны қаншалықты әділ немесе әділетсіз екенін көрсетеді.

PPDA (Passes allowed Per Defensive Action) – қарсылас команда допты жоғалтар алдында қанша пас жасайтынын көрсететін мәлімет, прессингтің интенсивтілігін, стилін (агрессивті/орташа/баяу) анықтайды. Бұл көрсеткіш қаншалықты төмен болса, прессинг соншалықты агрессивті екенін білдіреді.

Лидс «Ред Булл» жүйесін жетістіктер жағынан енгізбесе де, жоғары прессинг стилін имплементациялауда

Packing – алдыға берілген пастың қанша ойыншыны кескенін (доптың артында қалдырғанын) айқындайтын көрсеткіш.

Impect - алдыға берілген пастың қанша қорғаушыны кескенін (доптың артында қалдырғанын) айқындайтын көрсеткіш.

Тактикалық терминдер:

Жоғары блок/орта блок/төмен блок – қорғанып жатқан команданың прессингінің жоғарылығы. Яғни қай аймақта команда қарсыластарынан допты белсенді түрде алып қою әрекетін бастайтынын сипаттайды.

Контрпрессинг – шабуылшы команданың доптан айырылған сәтте бірден қарсыластан допты қайтарып алу талпынысы.

Cover-shadow – прессинг жасап жатқан ойыншының пас беру бағытын жабу әрекеті.

Грилиш Упамеканоға қысым көрсетіп, Паварға пас беру жолын жауып тұр (cover-shadow).

Жартылай қаптал – алаңды өн бойынан 5-ке бөлу: сол қаптал, сол жартылай қаптал, орталық шеп, оң жартылай қаптал, оң қаптал. Жартылай қаптал – қаптал мен орталық шептің арасындағы аймақ.

14 аймақ – алаңды 18 аймаққа бөлетін жүйе бойынша гол соғу үшін өте маңызды аймақтарының бірі, бұл аймақ алаңның ортасында дәл айып алаңының сыртында орналасқан. Аналиктерге сәйкес нәтижелі пастардың айтарлықтай үлесі осы аймақтан келеді.

Overload – шабуылшы команданың қорғаныстағы қарсыласының белгілі бір аймағында сандық басымдылық жағдайын құру.

Изоляция – ойыншыны 1-ге-1 жағдайына шығару, көбінесе қапталда орын алады.

Егер мақала ұнаса, осындай контентке толы телеграм арнама жазыл.
https://t.me/bcsula