Хусувэй ирыхана хуркари хэбидя яля” танясеты”. Теда’ хэвы иры’ пудана луца’ яля’ падаркана тум’ хабтабади” яля
Сиениць иры’ 30 яляхана Россия яна’ тиӈгэвна сямян хибя пожарной частьхана манзрана сава вади намдась. Я’ ӈавнанда 1649 похона яна’ параӈода тикы ялям’ таславэда. Ямал’ яханана пранана ӈаво хабтабада” ӈобтарем’ ӈа”и похо”на ӈадимы”. Ӈавна хардахана мяд” пяхад сертавы” ӈэвы”, ӈадъбята етри’ параӈгасетвы”. Тум’ хабтабади’ манзъядо’ тояна, саць тарана.
Сёяха’ хардахана тум’ хабтабада” манзъямдо’ минредо’. Тюкохона тарця манзрана 1970-ый похо”на ӈадимы”. Та’маляӈгы хардадо’ теда’ тамна надо’ ниня ӈамды. Тад та”альцюня 1995 похона несэй харадм’ яха’ тяханяд тэвравы”. Теда’ тикамдо’ тамна мэ”ӈадо’. Тикы’ та”альняю’ 28 по хая. Ӈари’ теда’ Сеяха’ хардахана 18 тум’ хабтабада. Пыдо’ сидя машинадо’, тад хуркари тум’ хабтаба мэта’ ӈамгэридо’ тня”. Пыдо’ мал” ӈопой санавадо’, манзъямдо’ пир”ӈадо’.
Тандъярка’, сиениць иры’ 30 яля’ нерцюня тум’ хабтабади’ няю” ӈока сава вадам’ хэтаць. Сеяха’ дом культуры’ мякна манзрана”, тохолкода ӈацекы” сё мэ”ӈаць. Станислав Вануйто ма”лёвы няхата ӈока ихид ӈэда вади ваде”ӈась. Мале пон’ манзрана няхата Ямальской район’ главахад грамоты ми”ӈась. Тад’ тикы’ хавна ЯНАО государственной казённой учреждения’ противопожарной служба’ ервхад ӈани’ грамоты ӈэдаравыць. Хэвы яля’ грамоты ня”амвы нина”: Михаил Вануйто, Максим Яптик, Дмитрий Салиндер тад Лев Окотэтто. Ӈобт’ ма”лёвы няхата пожарной часть’ ерв Николай Окотэтто ӈобтарем’ ӈока сава вадам’ хэтась: «Тум’ хабтабада” нини”, маня” манзъява’ ӈарка, манзъява’ тояна. Пыдара” хусувэй яля’ хонёвдавэй сырӈада”. Вэва сер” таняб’, мяд’ пранаб’ таминда’ санасетыда”. Маня” манзъяхана’ вэва сер” юӈгоя, ӈамгэхэрт пранана ӈамгэри юӈгоя. Манзра нята нин, сензада ӈада”, мядота’ тер” сенз’ ӈэя”, ӈацекыда’ вадабида”, савовна илехава”!».
Тад тикы яля’ нерцюня Сеяха’ тохолкова мякна ӈоб’ ӈарка лахарё ӈэвысь. Ӈацекэхэ”на манзрана” Всероссийский урок безопасности жизнедеятельности мэ”мыць. Тикы яля’ ваде”мэдо’ ӈокась: ӈамгэ пранаб’ ханзер” ӈэсь тара, тад та’ ныланава” яляха”на серт’ ниваӈгад ерев’, ханзер” ӈэсь тара. Ӈацекы”, ӈарка ненэця” ханяримна ядэрӈа”. Ядембадахана ӈацекы” ит’ падирць пэрӈа”, сянако ядэрць тум’ пятаӈгу. Хараси’ ту сянакуць вэва ӈэвам’, тикым’ тасламбиць, ит’ падирп’ тосарка тара. Ӈохолё ехэрана хараси’ идм’ сянакупта ӈэвам ӈоб’ ни тара’. Выӈгана, мяд’ хэвняна тум’ пятаба ӈобтарем’ ни серос’. Сертавы ту’ савамбоковна хбта тара.
Пранана тум’ хабтабада” тохолкова мят’ турмыць. Пыдо’ тохолкода ӈацекэхэ’ манзра мэта ӈавэдо’ манэ”лабтамбиць. Ӈацекы” ӈокаюм’ пеля тарцям’ манэць ехэра”, нянандо’ хусувэй ӈамгэ мэкадарха’ ӈэвы”. Ханяны” ӈацекы” машинм’ мю’ тюӈгаць. Тамна ханяӈы” тум’ хабтаба мэта костюм’ серыбиць. Тикы яля’ ваде”тадо’ ӈокась, пон теӈеӈгудо’. Неноховавна серт’ ериберп’ ни тара’, ӈамгэ еремда” таняб’, теневабта тара, ханзер” серо”ӈа.
Сиениць иры’ пудана яляха”на Сеяха’ тохолкова мякна мэна ӈацекы” пожарной частян’ ядэрӈаць. Интернатхана мэна” 6 группа’ тер” харто’ ӈудаха”нато’ паской ӈамгэм’ сертавыць. Пыдо’ воспитательто’ ня’ пластилинхад ёльце сава ӈуда’ терм’ тэвравыць. Тикамдо’ тум’ хабтабадаха’ ми” ӈадонзь. Ӈацекы манзъямдо’ мале сян яля’ интернатхана сертабавэдо’, варемдо’ мэ”мы”.
- Мале пон’ ибедорӈаваць, ӈамгэ сертаб’ сава ӈэдакы. Тедахав’ интернет танява. Тикахана ненэць хуркари ехэрана манэць пирта. Серта тарабата, тикахад тохода. Тум’ хабтабада” манзъядо’ тояна, саць тарана. Пластилинхад сертавы подарокм’ хана таслава”. Тикахана пранана тум’ хабтабади’ манзра мэта ӈамгэридо’ сертава”, тадтэйна”. Ӈацекы” тикым’ сертаба варемдо’ мэ” ӈаць, ёльце манзраваць. Ихина тэри сава, ӈуда’ терм’ сертава, - Людмила Сэротэтто ма, пыда Сеяхинской школа-интернатхана воспитательӈэ манзра.
Тум’ хабтабада” ӈацекэхэ’ манзра мято’ манэ”лабта”, манзра ӈамгэридо’ ваде”ӈа”. Ӈацекы” тум’ хабтабади’ ембдяро сера”, тум’ хабтаба мэта рукав ня”амбиць. Тамна ӈани ӈацекы” машин’ мю” танаӈгаць. Саць харвана” иняхана ляӈгабтыць, пожарной савамбовна сярадась, тад тю”уд ха”аврана’ тотрев’, таси’ енамбоковна ӈэдарада. Хахаяда яляха”на ӈацекы” тарця манэ”мэдо’ юӈговы. Интернат’ терха”на тарця ядэръя ӈули” сава. Хуркари ехэрана ӈамгэ манэ” ӈаць, хуркари тарана вади намдаць.
- Маня” группана’ тер” ня’ пожарной частян’ ядэрӈаваць. Ёльце савасей. Тум’ хабтабади’ манзра мяд’ мюй манэ” ӈаваць. Пыдо’ тум’ хабтаба мэта ӈамгэридо’ манэ”лабтаць. Хуркари” иня”, еся’ лоӈг” танявы”. Ня”марпа сава, манэсаръянаць. Мале пон’ тикахана мэваць. Ӈани’ сяхари’ ӈани’ хэбна” сава ӈэ”нив’, - Леонид Окотэтто ядэромамда вадеӈась.
Тум’ хабтабади’ инструктор’ по безопасности таня. Пыда интернатан’ тэворӈа, ӈацекэхэ”на лаханакурӈа. Нюдяко ӈацекэхэ’ садикан’ ядэрӈа, таняна вадам’ ваде”ӈа, мяд’ ниваӈгад пра’, ханзер” ӈэсь вэва, ханзер” тара, тикым’ ваде”ӈа. Тикы’ хавна Сеяха’ хардахана илена ненэцяӈг” тэворцяты, мядо”мана ядэрӈа, ненэцяи лаханакурць ня”на.
Тум’ хабтабади’ манзъядо’ ӈарка, тояна, саць тарана. Пыдо’ хусувэй яля’ ныхыдо’ хорпи”, пыхыдадо’ манзабтамби”, пыдо’ ныхыдо’ ӈока ӈэбта тара. Пожарной частьхана манзрана” сямян мероприятияха”на тарасеты”, сянако тарабата, сянакосеты”, пирдырцяты”. Ныланава яляха”на хуркари сянакубцха”на нертеӈгосеты”: футболм’ мэцеты”, баскетболхана, волейболхана харад’ тер” няха”нато сянакосеты”. Тарем’ ӈарка ненэця” мер” сюрберць пыхыдадо’ тохоламбсеты”. Ты’ хэбидя яляхана тум’ хабтабада” нина” ӈобтарем’ ныхыдырць, тароць ва”лёй ӈэсеты”. Теда’ ты” ниць нюртей яляхана Сеяха’ тер” футболм’ мэта”. Тикадо’ кубок пожарной части.
Пранана тум’ хабтаба мерета ненэць тара. Пранана тум’ табла мэбета ненэць тара. Тум’ хабтабада” мякна манзрана нина” мал” мереӈа”, мал” мэбеӈа”. Пыдо’ тум’ хабтава сер” манзъядандо’ таславэдо’, манзъямдо’ менэдо’, пирӈадо’.
Антонина Серасхова