Andre - sportdagi donolik, oltin kabi eskirmaslik va uslub timsoli.
"E'tibor jalb qilish uchun ahmoqona soch turmak bilan yurish shart emas."
Pirlo butun faoliyati mobaynida deyarli bir xil soch turmagi bilan yurdi, uning oxirida esa soqol o'stirishni odat qildi va bu unga yanada ko'rk bag'ishladi.
Andrea tatuirovkalarni unchalik ham xushlamasa-da, baribir uch bora o'z tanasiga yozuv yozdirdi: bo'ynida o'g'li Nikoloning ismini xitoy iyerogliflari bilan, uning pastrog'ida esa qizi Anjela sharafiga "A" harfi va nomsiz barmog'ining uzuk yopib turuvchi qismida sobiq rafiqasi Deboraning ismi.
Pleysteyshn haqidagi mashhur iqtibos
O'zining "Men o'ylayman, demak, o'ynayman" nomli avtobiografiyasida Pirlo PlayStation ni insoniyat tarixidagi g'ildirakdan keyingi eng yaxshi ixtiro deb atagan. O'sha mashhur iqtibos:
"2006-yilning 9-iyulida tushdan so'ng ozgina uxladim, keyinroq PlayStation o'ynadim va shu kuni kechqurun jahon chempionatini yutdim".
Aqlli futbol va jarima zarbalari
Pirloga uning o'yinini tasvirlab beruvchi bir nechta laqablar berishgan: Professor, Metronom, Arxitektor va Daho.
Uning tashrif qog'ozi - uzoq masofaga uzatmalar va jarima zarbalari. Jarima zarbalarini kimdan o'rgangani haqida o'z kitobida butun bir bob ajratgan:
"Agar xohlasangiz, meni Pirlinyo deb chaqiring. Men Juninyoning jarimalarni tepish manerasini diqqat bilan o'rgandim va bunga juda ko'p vaqt sarfladim. Unga o'xshab tepishni juda ko'p mashq qildim. Avvaliga juda ko'p marta to'p darvoza yuqorisidan o'tib ketaverdi, lekin men u vazoyatlarda muxlislarga "bu sizga sovg'a" deb yolg'on gapirardim.
Balki, endi men jarima tepishni eplab boshlaganimdan so'ng mendan ham kimlardir o'rganayotgan, taqlid qilayotgan bo'lishlari mumkin va bu juda ajoyib tuyg'u. Kimlar uchundir men Juninyo 2.0 dirman balki. Breshiya aksentida gapiruvchi Juninyo. Hech kimga aytmaganman, lekin maqsadim A seriyada eng ko'p jarima zarbasidan gol urgan futbolchi bo'lish."
Andrea o'z maqsadiga deyarli erishdi. Hozircha bu nom xuddi Andrea kabi A seriyada jarima zarbasidan 28 ta to'p kiritgan Sinisha Mixaylovich va Pirloga tegishli.
Yevro 2012 ning chorak finalida Arxitektor inglizlar darvozasiga panenka uslubida gol kiritadi. O'yindan so'ng bu uslub egasi, Antonin Panenka shunday izoh bergan edi: Men sizlarga aytsam, bu juda yaxshi ijro bo'ldi. Ayniqsa, shunday muhim o'yinda bu kabi xotirjam zarba yo'llash oson ish emas.