«Вәт сыйлап та куйдылар, өч көн эчендә туныма сыймаслык дәрәҗәгә җиткәнмен»

Күренекле шәхесләрнең тормышлары шулкадәр вакыйгаларга бай була, хәер алар үзләре – тоташ вакыйга! Легендар татар актрисасы Исламия Мәхмүтова белән дә берсендә бик күңелле хәл килеп чыга.

Бер елны Тинчурин театры артистлары Исламия ханымның туган ягы Әлки районына кайтканнар. Район өчен бу – зур вакыйга була. Тинчурин театры, бигрәк тә Исламия Мәхмүтова үзе кайткан бит! Әлбәттә, аларны тиешенчә итеп каршы алганнар. Бәлешләр, пилмәннәр, башка төрле нигъмәтләр белән сыйлаганнар. Бу хәл 3 көн дәвам иткән.

«Без инде төшке аштан баш та тарта башладык», – дип хәтерендә яңарткан бу көннәрне Россиянең атказанган, Татарстанның халык артисты Зөфәр Харисов. Шулай ныклы режимда 3 көн сыйланган дәвердә, чираттагы әбәткә барганнар. Ашап алганнан соң туннарын, пәлтәләрен киеп, урамга чыкканнар. «Вәт сыйлап та куйдылар, 3 көн өчендә туныма сыймаслык дәрәҗәгә җиткәнмен!» – ди икән Исламия ханым. Озак та үтми, артыннан кызы Лилия Мәхмүтова чыга. «Әни, син ялгыш минем тунны кигәнсең бугай», – ди икән Лилия.

Баксаң, гастрольгә чыгар алдыннан гына артисткалар икесе дә бер үк төсле тун алган булганнар! «Шулайдыр шул, мин инде 3 көн эчендә туныма сыймаслык булып симергәнмен, дип курыккан идем!» – дигән Исламия ханым. «Мин дә, шулкадәр ашау ябыктырган, дип сөенергә өлгердем», – дип көлгән Лилия Мәхмүтова.

Әлеге вакыйга турында Тинчурин театрының социаль челтәрдәге сәхифәсендә искә алганнар.