Нумда нарэйма. Тецьда мерця янамбовна ланума. Сырэй тотрев’ япа сят’ тебертада юӈгу. Я’ ниня янамбовна варё” ӈадимданна”
Сырам’ мерця сипида. Ненэця”, я’ сармик” сыра’ ямбан’ лимбека паныдо’ мэ”ӈаць, тадри екаӈгудо’. Яха”, то” тедарихив’ тамна няӈота салаба’ ӈылна хоны”. Хэвы си”ивхана хабейнда” хардан’ тэворӈаць, ӈацекыдо’ хосаяць. Тохолкода ӈацекы” я’ ханяри’ нэкалӈадо’.
Сеяха’ хардахана тохолкода ӈацекы” ӈокаюм’ пелядо’ хойня’ хаяць. Хусувэй каникулха”на пыдо’ ёльце маямба мякто’ паромби”. Нисянадо’ небянадо’ нюто’ паны, мальци тэврасеты”. Харад’ хэвхана иленя” ты пэртя” ӈацекыдо’ мал” ханасетыдо’. Тедахав’ меретя буран мэ”ӈа”, мер” тэворӈа”. Сава. Интернатхана хаюрта ӈацекы тяню. Тикахана мэни” нисянадо’ небянадо ӈаха”на иле”. Я’ мал’ няна мэна”, Тамбей’ тяхана илена” нюкцидо’ нидо’ мансабтамбю”. Тедари’ тамна тици, ӈацекым’ ӈаха’ минрева’ то”олха ниӈа’.
- Мань каникулха”на хойня’ ныланаванзь ханцетым’. Выӈгана ёльце сава. Хардахана пэртями’ юӈгосеты. Телефонрим’” няамба тябехосетыдм’. Ӈадъбяни’ ненэй мят’ хаядамсь. Мань нисями’ тедари’ хардахана мэ. Теда’ некани’ мякна ныланадм’. Ёльце сава. Нядаӈгудм’. Харни’ ӈэдалыдм’, халям’ пэрӈава”. Хахаяда мяк’ мядоманзь ханцетыва”, ма”алкосетыдм’, поӈга ватабива”, - Владислав Вануйто ма, пыда 8 классахана тохолку.
- Тедахав’ тэри сава, ӈацекы по’ ямбан’ хойня’ ӈэдарамбидо’. Ӈавна маня” сырэй ныланава ялярихи”на хойняӈы мякна’ ханцетыва”. Теда’ ӈэрё’, нара’ ӈацекэця” вынд’ тэворӈа”. Тикар ёльце саванё. Тад нерня ид хурка ӈэӈгодакы, манэ”ита юӈгу. Тиканда ӈацекы хойняӈы илам теда маниебто тара. Пуна тэри хамзхаялӈгу. Харобта ты хаёда юӈгоданакы, вэванё. Ӈацекы хойняна нисянадо небянадо нядабаӈгу, ӈавкыдо мание, ненэй мякнандо мэ, - Любовь Окотэтто ма, пыда выӈгана иле.
Нылана ялэ” нюртей яляха”на Алла Хосейвна Вануйто няби Сэрне Хойковна Окотэтто ноб’ ӈарка манзаям’ пяӈаханзь. Пыди’ социальной педагогӈэ таранаха’, мядо”мана ядэрӈаханзь. Ӈацекы’ небяхато’ нисяхато’ вади’ тэврамбихинзь. Ныланава яляха”на пыдо’ нюдо ханяримна ядэрпато’ вэва, таславы час’ тяха’ ӈацекэхэна ядэрць ни серос’. Тад’ тикы’ хавна ӈацекы” ханяримна падирць пэрӈа”. Тахабэй харад’, труба’ нид санарць вэва ӈэ”нив’, ӈэмда, ӈудамба ханзер” мэӈгува”, серт’ еремдава, тикар вэванё’. Тикы’ е”эмня соцпедагогха’ ӈацекэхэ’, ӈарка ненэцяӈг’ табекосетыхы’. Тикы - манзъяди’. Пуна ӈацекы’ серт’ еремб’, лаханаванда ӈока ӈэвы ӈэӈгу.
Тамна ӈамгэ мян’ Сеяха’ тохолкода” Яр-Салян’ хаяць. Таняна сянаку”. Волейболм’ мэ”ӈа”, баскетболхана нидо’ нертемби”, футбохана сянаку”. Тня’ Ямальской район’ тиӈгэвна тохолкода” ӈацекы” ма”лёвы”: Сеяха’ тохолкода”, Панаевск’ тер”, Салемал’ ӈацекы”, Мыс’ Каменыйхана мэна”, Новый порт’ тохолкода” тад Яр-Саля’ ӈацекы”. Пыдо’ пирдырць варемдо’ мэ”ӈа”. Хурка ӈэӈгодакы”, тадри манэ”тава”, тедари’ тамна сянаку”.
- Маня” сидя юд’ мян ӈацекым’ тэвраваць. Не ӈацекы” хасава ӈацекы” варемдо’ мэпто’ тарась. Теда’ маня” енармана хамеко ява’ тянюрка. Тохолкова мя”ма тамна сертабидо’, несэймдамбидо’. Тиканда сянакованзь СОК "Айсбергм’" мэ”ӈава”. Таняна тренировкам’ мэта ӈобтарем’ ӈока: ӈарка ненэця”, тохолкода ӈацекы”, не”, хасава”. Спортивный залва’ яля’ ямбан' панцеты”, мер” хубтахад, пэвсюмя няӈы хонава’ ӈэсонд, - Георгий Вануйто ма, пыда Сеяха’ хардахана ӈацекы физкультуран’ тохоламби.
Хардахана хаёвы” ӈацекы” ӈобтарем’ тэри’ ӈамдю”. Пыдо’ манзаядо’ ӈока. Хусувэй яля’ нянандо’ манзрана” воспитатель” хуркари серо’ ӈадимдемби”. Тарем’ тохолкова мякна 27 мартахад 31 ӈэсонд’ тарцям’ мэ”ӈа” Школа Лидера «Искусство внутри нас». Тикахана ныланана” ӈацекы” сянакода”: транидо’ траӈгу”, сё мэта” сём’ мэӈа”, падтаӈго теневана” падтаӈгодурӈа”, тикы’ хавна театрм’ ӈадимдембаӈгу’. Теневана” ӈацекы” ехэрана нидо’ тохоламбӈгу”. Тад тикы’ хавна школахана тамна хуркари мероприятия” таня”. Неӈэдя си”ив ямбан’ ныланана” ӈацекы” классаха”нато’ сянаку”, музейн’ тэворӈа”, сяйнамзь ма”люрӈа”.
- Маня” понедельникхана интернатханана чаепитиява’ ӈась. Классный руководительва’ няна’ турӈась. Тохолко нята нини’ ӈобтарем’ интернатан’ тоць. Алексей Вячеславович сяйманзь хуркари ӈавар тэвравысь. Сяйӈаваць. Тикы’ хавна хуркари сянакубцха”на сянакуваць. Тарем’ ӈобт’ тэворма ёльце сава, - Ксения Вануйто ма, пыда Сеяха’ тохолкова мякна 5 классахана тохолку.
Сыра’ ямбан’ ӈацекы” тохолковандо’ хавна хуркари манзая пэрмы”: сэдорана” сэдоравы”, панорта” панормы”, ӈодякохот сертаӈгода”, ӈобтарем’ панормы”. Хэвы си”ив пудана яляхана Сеяха’ тохолкова мякна выставкам’ ӈэвысь, нюмда «Роднее Ямала есть ли земля?» Тикахана хуркари паской ӈамгэ” таня”: мадавэсавэй имбытад”, ӈодякохот сертавы пад”, ты’ таркад сэрвы туцякоця, нойхана падтавы, ӈодяхона нядавы падкоця, хуркари мэсьротна” паны”, ембдяр”. Тикы конкурс, тиканда сян’’ яля ӈэсоӈгана намдаӈгува”, ханяӈы манзъя сава ӈэвы.
Хэвы си”ивхана, ныланава ялэ” пэванзь мэбто’, ӈацекы” тохолко лабэсато’ мюй халтамбиць. Падна партыдо’, ӈамдёрцяидо’ савовна тэпиць. Манзъидо мале сянакуць. Ӈарка ӈацекы” иӈудм мэйрамбда сянакубм мэӈаць «Ура! Каникулы!» Сямянхат нюдяко” падтаӈгосеты”, хардандо’ хэвхана сянаку”. Тамна ӈаркамбой” школа’ спортзалхана пирдырӈаць. Ӈацекы” нидо’ нертембиць, ныхыдырӈаць, сюрберӈаць, мячхана сянакуць. Тикы’ хавна интернатхана мэна” ӈацекы” группаха”нато’ хуркари тарана фильм мание”.
Теда’ нумда сава. Ӈацекы” ӈокаюм’ пелявна пихина ядэрӈа”. Я’ ядхад ханакохона едэйку”, етя сертавы лата’ ниня ӈэдалёрӈа”. Хардахана мэна” лыжаха”на ӈэдалерӈа”. Интернатхана хаёвы” ӈобтарем’ тэри ни’ мэ”. Пыдо’ хусувэй яля’ пивня ядэрӈа”. Тандъярка’ 4-5 классахана тохолкода” хойняку’ ядэрманзь ханӈаць. Таняна ӈацекы” воспитательто’ ня’ я’ ядхад едэйкурӈаць. Сянако малехэва я’ ядхана, хэӈгхана сяйӈаць. Тарекам’ ӈацекым’ харад’ хэвняку’ тэво”лава ёльце сава. Ӈацекэця” пон’ тенеӈгудо’.
- Теняна маня” группана’ ня’ хойняку ханӈаваць. Воспитательхаюна’ ня’ Татьяна Анатольевна няби Антонина Николаевна ня’ сяйнаваць. Ледянкы ханаваць, я’ ядхад ӈэдалёрӈаваць. Хибява”тяхана хэись. Ёльце савасей. Сямянхат няхатана ӈахана хэвы нява Андрей. Пыда мерець хэсеты. Нява’ тэва я”маваць. Мале ӈахакуна ядэрӈаваць, забойка’ хэвхана. Яд ӈули” сава ӈэвысь. Каникулна’ тамна ямб’, ӈани’ ханданакэва”, - Виталий Вэнго, Святослав Лаптандер, Ангелина Яунгад ядэро”мидо’ ваде”ӈаць.
Тадри луца’ яля’ падаркана апрель ӈадимда. Ненэй ненэцяи” яля’ падаркана сиениць иры мале ӈадимысь. Ненэй ненэцяи” яля’ падаркана нув’ ня’ сырап, ирын’ сырта” тенева”, ӈамгэ иры’ миӈа, ӈамгэ иры сусаса. Янамбовна, ёльцяӈганда нарэй яля” то”. Сельбя няна вэвако мальцяха”на, панэхэ”на тецьда маат’ тюӈгась. Хой’ тер” сыв’ нерцю’ мал” таны ханодо’ тадэйдонзь. Мядото’ ня’ сырэй паныдо’, ёря ея сераць. Я’ ний ёря сырахана синдадась. Тадри тикар янамбовна холканаӈгу.
- Нумда нарэйма. Тецьда хая. Ӈэрёй ямбан’ сыра’ няхар” ха”морӈась. Сырэй ханона” хэвхана мэбна”, хад’ лаӈгхал” турӈаць. Нюртей сидя сыра холкаӈаханзь. Тына” саваць, савовна нылэйдаць. Сыра’ ямбан’ нумда савась. Я”авлада мерцяхав’ таняса”ма. Тецьдада илева’ пирась. Теда’ хурка ӈэӈгодакы. Тандъярка ӈопой яля’ сарёсь, пыдёсь. Тикы’ пуд вэнзер” ханимбата вэва, я’ ний салаба хэсь пир”ӈада. Теда’ ӈани’ тецьда” я”авлахама”. Ханяӈы’ яхана мале я ний салаба. Тикар тэхэ”на вэва. Нара’ няна ты” ныхсялворӈа”. Ты нядам’ тэва я”амсеты, салаба тояна, няда салаба ӈыл’ еремда. Тэкоцина” ӈани’ нииць вынхалу”. Маси’ тарця юӈгоданакы, - Максим Окотэтто ма, пыда выӈгана иле, ты пэрӈа.
Яля’ сэв’ ядемя. Ялэй нум’ ямбума. Тадри ты пэртя” таӈы яхатато’ мюсялтыд”. Янамбовна, хусувэй харта недармида нёда, мюсе. Харад’ тер” ӈобтарем’ манзъядо’ ӈока. Хусувэй харта серканда, миндканда харта манзъяида пя.
Антонина Серасхова, внештатный корреспондент газеты "Время Ямала"