Иркәнең яңа фотосын тәнкыйтьлиләр: «Син бит өч бала әнисе, ирең сугышта...»

Җырчы Иркәнең кыска күлмәк киеп, өстәл өстенә утырып төшкән фотосы «ВКонтакте» сәхифәсендәге дуслары арасында шау-шу уяткан. Ирен сугыш кырыннан көтүче 3 бала анасының мондый позада утыруын халык өнәп бетермәгән – әлеге пост янына һәр икенчесе комментарий язып калдырган.

«Иркә, мин синең үзеңне дә, җырларыңны да, тавышыңны да бик яратам. Тик бу фотоң ошамый. Син бит 3 бала әнисе, ирең сугышта, яшең 39да. Авторитетыңны төшермә»;

«Мин карарга оялам, менә шуңа да хәзер хатын-кызның дәрәҗәсе түбән»;

«Ни әйтергә теләгән бу хатын әлеге фото белән? Сәхнәгә менеп, сүз саен «Аллаһка шөкер» сүзен әйтәләр. Ни әйткәннәрен һәм ни кыланганнарын белмиләр. Урам кызлары кебек киенеп, урам кызлары кебек утыра. Ояты качкан. Татар халкының да иманы качкан, динсезләр, имансызлар гына хуплый ала бу фотоны»;

«Килешеп бетми»;

«Ире сугышта, ә моның шатлыгы эченә сыймый, адәм хурлыгы»;

«Сез куйгач, без карарга мәҗбүр инде татар хатын-кызларының йөзен пычратканны»;

«Ир сораган хатыннарга охшаган»;

«Ирең өчен дога кылып утырырга кирәк, һәр адымың фотога төшереп түгел. Безнең татар артистлары бөтенләй оятларын югалтты, сәхнәгә нәрсә киеп чыкканнарын белмиләр, берсен-берсе уздырып «чишенәләр». Аз гына тыйнаграк булырга ярамыймы икәнни? Яше дә 18дә түгел бит инде хәзер», – дип, әллә ниләр язып бетергәннәр. Кайбер комментарийлардан соң Иркәнең виртуаль дуслары арасында чын бәхәс купкан, «су буе» комментарийлар җыелган.

«Һәрбер җирен тасвирлап әрләгәч күңелләре булып, «Иркәне яшәргә өйрәттек» дип күңелләре булып, сөенеп яшиме икән бу халык? Безнең Иркәгә бәйләнеп кан басымнары күтәрелә, йөрәкләре ешрак кага башлады бит, югыйсә.

Ә шатланып торсалар, шушы дөньяның илаһи матурлыгына, якты кояшның җылы нурларын сибеп язны алып килүләренә, кошларның чырык-чырык итеп, дөньяны яратып, бер-берегезне хөрмәт итеп яшәгез, дип җырлауларына, карның матур күлләвек ясап эрүенә, әбиләрнең тышка чыгып арка җылытып торуларына… И күп инде ул матур мизгелләр. Ошамаганын күрми кала белергә кирәк. Бер гөнаһсыз кешене бетереп ташлауда шатлык табудан булмасын гомерегез. Булганына сөенеп, шөкер итеп, Ходайга рәхмәт әйтеп яшәгез.. Сез дөнья хөкемдары түгел», –дип нокта куйган бу комментарийларга һәм бер-беребезгә карата мәрхәмәтлерәк булырга өндәгән Иркәнең бер язылучысы.