Үзем аралашучан булгангамы, икедән артык балабыз булу сәбәплеме, төрле сораулар еш ишетергә туры килә. "Барысы да синекеме? Җир алдыгызмы инде? Үзең теләп күп бала таптыңмы? Ирең кушамы әллә? Ничек өлгерәсең? Бер-берсеннән көнләшмиләрме? Эшкә чыгасыңмы инде?..."
Сораулар кабатлана, арта бара. Ничек җавап бирергә аптырап китәсең кайчак. Дүртенче бала туып, бер атнадан ишегалдына чыккач, танышым очрады. Малаймы-кызмы, исемен, кайсы роддом һәм башкаларны ишеткәч, "бишенчегә барасызмы?" - дип сорады. 🙄 Әйе, бер атнадан соң шуны гына уйларлык.
Үземнең дә элек күп балалы әниләрне күрсәм исем китә иде: мин бер бала белән дә бушамыйм, кайвакыт чәйне кайнар килеш кичен әтисе кайтып, баланы алгач кына эчәм, кайберүләр җидешәрне үстерә, дип уйлый идем. Шуның өстенә эшлиләр дә, бөтен нәрсәгә җитешәләр дә.
- Ничек өлгерәсең? - дип, өч балалы таныш әнидән сораган идем. Шул сорауны бирүче йөз дә беренче булганмындыр инде ул вакытта.🤦🏻♀
Хәзер миннән дә "Ничек өлгерәсең",- дип еш сорыйлар. Дөресен әйткәндә, өлгермим. Шуны аңладым: эшлисе килгән бөтен нәрсәне дә һәрчак өлгереп бетеп булмый. Тәүлектә тагын бер-ике сәгать булса иде, дип уйлаган чаклар була. Әмма алар юк. Булганына сыешып барырга кирәк. Әгәр кызык булса, бәлки үзегез дә белгән, вакыт җиткерү буенча 5 лайфхак-киңәш язып китәм.
- Режим. Әйе, мәктәптә укыганда "менә үскәч теләсә кайчан ятам, теләсә кайчан торам," - дип уйласаң да, режим белән яшәү җайлырак. Уку вакытында гына түгел, каникулларда да. Яту-тору соңрак булса да, ашату, уйнау, урамга чыгып керү, теш чистарту, йоклатулар һәркөнне бер вакыттарак кабатланса, үзеңә дә, балаларга да җиңелрәк. Билгеле инде, яшьләренә карап төрләнә, үзгәрә.
2. Ярдәмчеләр. Әгәр дә сезнең якында гына әби-бабайлар, няня яки башка кешеләр балаларга күз-колак булырга, яки өй эшләрендә булышырга бар икән, бу инде зур бәхет дигән сүз! (Җәен авылда вакытта мин дә үземне отпускка чыккандай тоям. "Нигә яңгыр ява? Әйдә уйныйк," - дип сорап, мине генә аптыратмыйлар, беребез аш пешерсә, икенчебез тәртип урнаштыра тора) Әгәр дә юк икән, хәзерге заманда "ярдәмче" техника бик тә булыша ала. Без дә шәһәрдә үзебез генә яшибез. Автомат кер юю, савыт юю машиналары, мультиварка, блендер, электр иттарткыч һәм башкалар вакытны, хәлне янга калдырырга нык ярдәм итә. Түләүләрне банкларда йөрмичә өйдән электрон түләүне, сайтлар аркылы чиратларга язылу, документларга заказ ясауны монда кертергә мөмкин.
3. Планлаштыру. Әйе. Бер айга, атнага, көнгә бүлеп план кору уңай нәтиҗә бирә. Интернетта флай-леди дигән система белән дә танышырга мөмкин. Списоклар язып эш итсәң, тагын да яхшы. Мин кайчак язам, кайчак план башымда гына була. Язсаң 📝 файдасы күбрәк. Онытылмый да, эшләнелгәнне сызып ташлаганда рәхәт булып китә. Әмма план төзегәндә кинәт килеп чыгасы, көтелмәгән хәлләргә дә урын калсын. План Б. Әгәр бу ялларда табигатькә чыгарга җыенгансыз икән, яңгыр яуса нишләргә дигән вариант та булырга тиеш. Әгәр планнар үтәлмәсә дә, каты кайгырырга кирәкми. "Хәерлегә булсын!" - дибез. Ул бит үзебез язган план. Ходайның язганы димәк башка булган.
4. Өйдә һәр нәрсәнең үз урыны булсын. Кием-салым, савыт-сабаның гына түгел, кайчы, кием щёткасы, коньки яки таракның да. Алган төшкә куела барса, эзләп вакыт узмас. Гел куллана торганнарын якындарак, әллә нигә бер кирәклесен ераккарак җыйсагыз, тагын да җайлы була. Чынлап.
5. Бу киңәш алдагысына бәйләнгән. Өйдә артык булган, кирәкмәс әйберләр күп тотмаска. Ни өчен күп тотмаска, дим? Чөнки кирәге чыгар, торып-торсын әле дип алып куйган, кемдер бүләк иткән, әзрәк кечерәйсә дә, киярмен әле ябыксам кебек әйберләр барыбер була. Менә шуларны киметергә. Инде ике курткагыз өстенә, өченчесен аласыз икән, тегеләрнең берсен булса да бирегез, яисә сатыгыз. Җыелып ятмасын. Шкаф, балконнарыгызга вакыт-вакыт ревизия ясарга да мөмкин. Кунак килсә йоклатырга әзерләгән мендәр-юрганнарны "шкаф бушатам" дип, чыгарып ташламагыз инде.😉
Гади генә булса да, өстәге киңәшләр тормышны җиңеләйтерләр. Әле тагын дәвам итеп булыр иде. Үзегезнең дә куллана торганнарыгыз күптер. Мин дә сездән өйрәнер идем. Комментларда языгыз.
#татарскийязык
татарчаязам#казань #татары #татартеле
тугантел
