Болытымның якты истәлегенә багышлыйм
Сүз башы
Болытымның якты истәлеге... Болай әйтү ярыймы икән, кеше түгел бит ул, песи генә. Песи генә? Юк, чикләүче кисәкчәне куллану һич тә урынлы түгел. Төгәлләбрәк әйтим, песи генә түгел, йөрәгемнең бер почмагында – бик зур, киң почмагында урын алган песи ул, ул урынны мин башка беркемгә дә бирмәячәкмен. Тормышынмда күптән аралашкан, сөйләшкән, авыр вакытта да, шатлыкта да бергә булган кешеләр бар, өебездә инде дүрт-биш айлык икенче бер песи баласы йөгереп йөри, аңа да ияләштек, аны да яратабыз, аны да яратам. Әмма синең урыныңны беркем ала алмаячак, Болытым. Сагыш белән мәхәббәт, наз белән үкенеч бергә укмашкан болыт булыш яшәрсең син йөрәгемдә, җаным.
1 нче бүлек. Бәхетле беләзек
Көрән сызыклар төшерелгән ак күлмәген киде дә, бераз уйланып торгач, кулына төсле ташлардан эшләнгән беләзекне такты Гөлия. Беләзек дисәң... сигез яшьлек кызы Сылуның балалар өчен эшләнгән махсус җыелмадагы хәрефләр төшерелгән пластмасс ташчыклардан, сәйләннәрдән тезеп ясалган бер әйбер. Кызлар үзләренең, бер-берсенең исемен җыеп, шундый бизәнгечләрне бер-берсенә бүләк итәргә яраталар бит. Сылу да, дус кызына “Регина” дигән беләзекне бүләк итсә, әнисенә “Болыт” дип язылган беләзек тактырды. Әни дә, кыз да аны “уңыш китерә торган” беләзек дип атадылар һәм саклап тотарга, уңыш аеруча кирәк вакытта кияргә дип сөйләштеләр. Ә уңыш бүген бик кирәк Гөлиягә. Ул җитәкчелек иткән бүлек проектның каралама вариантын башкарды, аны аклыйлар икән, киләсе биш елда эшләр тәгаен гөрләп барачак, дигән сүз. Беләзек яткан тартмада сары тышлы дәфтәр дә ята. Аның берничә бите генә язылган. Ул дәфтәрне Гөлия сирәк, шул ике-өч айга бер ачып карый да кире куя. Анда башка язарга да, аны ташларга да ярамый. Эчке омтылышы булса да, язылган битләрне хәзер укымаячак Гөлия. Җаваплы очрашуга кадәр вакыт бар, әмма ул анда эшлекле, бераз кырыс, җаваплы, хисләрен тыя белүче, акылга таянып эш итүче рционалист буларак барырга тиеш. “Хисләр – аннары, кайткач”, – дип юатты ул көйсезләнә башлаган эчке баланы.
Сары дәфтәрдәге язулар
Беренче язу
Болытым минем! Йөрәгем минем! Сине ачуланыйммы? Үземне битәрлимме? Язмышка язылган дип юанып утырыйммы? Нишләсәм җиңелрәк булыр, өзелә бит, йөрәк мең кисәккә өзелә бит? Тормыш-яшәеш мең-мең кисәккә бүлгәләнде, мантыйкка ярашлы сурәтен югалтты. 12 июньнең иртәсендә син безне ташлап киттең. Сиң җан биргәндә, мин яныңда юк идем. Мин клиникага иртән килергә тиеш идем, башта эчеңдәге яраларны тегеп операция ясарга тиеш иделәр, ә аннары – ике арткы тәпиеңә.
...Тынычсыз-газаплы төннең яртысы үтеп, инде таң атуга санаулы сәгатьләр калганда күңелгә тынычлык иңә башлаган иде. Интернет челтәрендәге язмаларда песиләрнең дүртенчен каттан төшеп һәлак булган очраклары булган кебек, хәтта 10 каттан төшеп исән калганнары турында да язмалар бар. Иң мөһиме – мөмкин кадәр тизрәк табибка күрсәтергә. Болытым, минем күз алдында төштең, шунда ук такси чакырып ветклиникага бару хәстәрен күрдек. Фатирга кергәндә, син исән иде, әмма арткы аякларының асылынып торуы, күлмәгемнең куе кызыл кан тамгалары белән буяла баруы хәлнең мөшкелеген күрсәтә иделәр. Авырту газабына түзә алмый бармагымны тешләдең, янда торган кызым Сылу: “Әни, синнән шыбырдап кан ага”, – диде. Болытым, синнән дә, минем бармактан да кан агып, күлмәгемне һаман таплый барды. Ул күлмәкне мин мәңге ташламам, хәтәр вакыйгаларның шаһиты булып яшәр ул.
(дәвамы бар)
Дуслар, хикәя ошаса, "лайк" куярга, язылырга онытмагыз!