Басу юлы буйлап яланаяк
Йомшак тузаннарны туздырып.
Йөгерәсем килә бала-чакта сыман
Тик җилләрне генә уздырып.
Адашасым килә арыш басуында,
Бер каласым килә югалып.
Йөгерәсем килә, йөгерәсем,
Офыкларга таба юл алып.
Бер көләсем килә рәхәтләнеп,
Яңгыратып басу-кырларны.
Бер җырлыйсым килә яшьлегемдә
Җырланмыйча калган җырларны.
Ишетәсем килә болыннарда
Әтиемнең чалгы тавышын.
Берни басмый икән йөрәгемнең
Яшьлегемне сагыну сагышын.
....... АЛЬФИРА.....
