Казанда яшәүче 15 яшьлек Илья Салин төрле әкият геройларын булдыра. 10 ел элек башланган мавыгуның нәтиҗәсе - йөзләгән курчак. Барысында да егетнең үз стиле чагыла.
Илья САЛИН курчаклар ясаучы Барысы да театрга барудан башланды. Миңа спектакльнең сюңеты түгел, ә курчаклар һәм аларны ничек уйнатулары кызык булды. Сәхнә артындагы тормышны күрәсем килде. Театрдан кайткач, үзем дә кәгазьдән бер курчак ясадым. Аннан соң күрше кызы белән өйдәгеләргә спектакль куйдык.
Бер курчакны ясау өчен якынча бер атна кирәк. Ә материалларга килгәндә Илья нәрсә белән генә эшләми. Шешә бөкеләреннән дә курчаклары бар. Лукоморье әкиятендәге геройларны ясау өчен 500 бөке кирәк булган.
Аның әкияти тычканнары чәчәкләргә әверелә, галим мәче тән төсен 4 тапкыр үзгәртә, 9 нчы майга әзерләнгән курчагы хәтта елый.
Илья «Әкият» курчак театры каршындагы студиядә шөгельләнә. Спектакльләр дә куя. Аның әсәре хәтта Санкт-Петербургтагы төп мәйданда да күрсәтелә. Бу елның премьерасы - Щелкунчик. Бу спектакль өчен ул 80нән артык курчак ясаган. Биредә ул режиссер да, рәссам да, актер да.
Иҗатында аңа бөтен гаиләсе көч биреп тора. Иң мөһим тамашачысы, иң кадерлесе - әнисе.
Ангелина САЛИНА Ильяның әнисе Ул гел эзләнүдә, һәрвакыт яңа әйберләр уйлап табырга омтыла. Үзе акча эшли ул. Моның өчен куп вакыт һәм көч куйганын да күрәм. Без аның уңышларына сөенәбез, ярдәм итәргә тырышабыз.
Үзе генә өйрәнеп калмый, башкаларга да ярдәм итә ул. Илья курчаклар тарихы һәм аларны ясау буеча дәресләр оештыра.
Яшь егетнең хыяллары да зурдан. Яңа спектакльләр кую, киләчәктә режиссерлыкка уку һәм үз театрын ачу.