Пошкырт кундемысе марий ансамбль-влак
«Мишкан сем» ансамбльлан -15 ий
Сулен налме канышыш лекмеке мыняр-гынат яра жап лектеш. Тиде жапым мӧҥгыштӧ гына тошкыштын эртараш чылаж годым кумыл ок тол, чонлан келшыше моло сомылымат муаш лиеш.
Лач тыгай корно дене каеныт 2007 ийыште 15 ий ончыч «Мишкан сем» ветеран-влакын ансамбльым шочыктышо ӱдырамаш-влак. Районысо ветеран-влакын Советышт Тӱвыра полат сулен налме канышыш лекше ийготан-влаклан хорым почаш темлен. Но тӱрлӧ амаллан кӧра пенсионер-влак шагалрак погыненыт. А чулым, мураш йӧратыше ӱдырамаш-влак ансамбльым чумырымо нерген ойым луктыныт. Тыге «Мишкан сем» ветеран-влакын мурышо ансамбльышт шочын.
2010 ийыште «Мишкан сем» ансамбль «Калык» лӱмым сулен налын. Тиде творческий коллективым сылнын мураш Тӱвыра полатын музыкальный пашаеҥже, уста баянист-влак Геннадий Иксанов ден Нагим Бабичев туныктеныт. Ансамбльын тӱҥалтыш ийлаштыже нунылан музыкальный пашаеҥ В.В. Васильев полшен шоген.
«Мишкан сем» калык ансамбль тӱҥалтыш гычак «Илыш, мый тыйым йӧратем!» республикысе фестивальыште мастарлыкшым ончыктен, куд ий почела фестивальын зональный йыжыҥыштыже выступатлен.
Тиде конкурслаште «Мишкан сем» ятыр гана призовой верлам налын да Уфа оласе Конгресс-холлын залыштыже, Башкортостанын ик эн сай сценыштыже гала концерт годым ик гана веле огыл марий мурым йоҥгалтарен.
2017 ийыште «Мишкан сем» ансамбльлан «Огни Агидели» фестивальыште мураш пиал логалын. Коллектив Агидель олан пайрем кечыжлан шкенжын сылне марий мурыжым пӧлеклен.
Шиждегече 15 творческий ий-влак эртеныт. Тек ончыкыжымат тиде коллектив шкенжын мастарлыкшым шуарен толеш.
Е. ШУМАЕВА, «Мишкан сем» ансамбльын мурызыжо.
#МАРИЙЦЫ