ЧОЛМАН

Шаршудан изурем Йошкар-Оласе «Ото» савыктыш пӧртыштӧ Игорь Губаевын почеламут, лудыш-влак сборникше лектын. Автор тымарте посна книгам савыктен огыл гынат, марий сылнымутышто лӱмжӧ палыме: тӱрлӧ газетыште, «Ончыко» журналыште почеламутшо-влак жапын-жапын лектын шогеныт. Поэт Калтаса районысо Кӧкыш ялеш шочын, Нефтекамск олаште лектын шогышо «Чолман» газетым 30 ий ожно шочыктен да кызыт тудын тӱҥ редакторжылан ышта. Игорь Губаев икымше книгаштыже шочмо кундемын эртымгорныжо, айдеме пӱрымаш нерген шонкала, кызытсе жапым, тудын еҥже-влакым сӱретла, йӧратымашым, яндар чон шижмашым мокта. Сылнымут йылмыже чонеш пижше, шке кундемысе калык ойын ямже дене сымыстарыше. Книгам Финн-угор литератур фондын стипендийже кӱшеш савыктыме. Альбертина ИВАНОВА, поэт, Марий Эл искусствын сулло пашаеҥже. Йошкар-Ола.

Марий вургем «Калыкын йылмыже, йÿлаже, вургемже пыта гын, калыкшат пыта!» - каласен Миклай Казаков. Тиде тыгак. Меат, кызытсе самырык тукым шкенан йылмынам ынже мондо манын, Янахмат школышто тунемше-влак дене чыла марий пайремым эртараш тыршена. 21 февральыште тÿням-балне чыла калык Шочмо йылме кечым палемда. Мемнан тунемшына-влакат тиде кечым шÿм вургыж вучышт. Кажне класс марла мурым, куштымашым ямдылыш. Тиде кечым марий вургемлан пöлеклышна. Музейыште аралалт кодшо вынер тувыр, кызытсе вургем нерген каласкалышна. Йоча-влак 1892 ийыште Америкыште эртыше Тӱнямбал выставка, кугезе ковайна-влакын вынерым куаш, тÿрым тÿрлаш мастар улмышт нерген пален нальыч. Тыгак Марий вургем конкурсым эртарышна. Кажне класс гыч ик конкурсантым ойырышна. Кажныже шке мастарлыкшым ончыкташ тыршыш, шке вургемжым аралаш мурен-куштен пуыш. Нунын коклаште нылымше классыште тунемше ÿдыр-влак да визымше классыште тунемше ӱдыр-эрге-влак ойыртемалтыч. Моло тунемше-влакат почеш кодаш ышт тырше. Тыге ме шочмо йылмым арален кодаш да тунемаш тÿрлö йӧным ыштена, вет марий йылмына - калыкын эн кугу, шергакан, шöртньö поянлыкше, тудым ончыкыжат вияҥден шогыман. Авторын колтымо фото. Н. МИНЛИКАЕВА, марий йылмым да литературым туныктышо. Янахмат школ, Шаран район.

Пошкырт кундемысе марий ансамбль-влак "АРАМА" МУРА, КУШТА Изи Соказаште изи гына клуб уло. Но тиде клубын артистше-влак чыла пайрем годымат ялче-влакым мурымаш-куштымаш дене куандарат. Тышкак изи йоча-влак заниматлаш коштыт, кугырак ийготан-влакын «Ош пеледыш» да «Арама» ансамбльышт пашам ыштат. Таче «Арама» мурышо-куштышо ансамбль нерген каласкалынем. Мый тудым 2017 ийыште шочыктенам, тугодсек ансамбль районысо фестиваль ден конкурслаште шке мастарлыкшым ончыкта. Ӱдырамаш-влак мурат, а самырык ӱдыр-влак куштат. Пытартыш жапыште репертуарыш вашталтышым пуртышна, чыланат мурен куштена. Вургемым шке ургена, а чап грамотым але дипломым налмына годым умылена: тыршымашна арамлан огыл. Но тӱҥ акым мыланна ончышына-влак пуат, кунам мемнан выступленийнам йӧратат, мемнан мурымына почеш куштат, мемнан дене кугешнат. Алёна АХМАДЕЕВА, ялысе клубын культорганизаторжо. Пӱрӧ район.