Исеме: Хафизова Талия Азат кызы (Талия Хафиз)
Туган көне: 14.11.1998
Туган урыны: Казан
Тәмамлаган: Англиядә урнашкан Дарем Университетының музыка юнәлешен (магистр)
Инстаграм: @taliyahafiz
“Иҗат минем өчен ул – тормыш! Шулай ук һәрберебез өчен рухи азык, арт-терапия, медитация, дип тә өстәр идем. Иҗат дөньясында кайнарга сәләт, мөмкинлек биргәне өчен һәм үз эшләремә карата кайтавазлар алуыма Аллаһка мең рәхмәтлемен! Чөнки мактау сүзләреннән соң тагын да канатланасың! Кыскасы, ИҖАТ ул минем өчен И-хлас ҖА-нның Т-еле!” , - ди Англия композиторы, Казан кызы Талия Хафиз.
6 яшьтә туган мәхәббәт...
Кечкенә вакытта актриса һөнәрен үзләштерергә хыялландым, аннары язучы булырга карар кылдым... Тик үсә төшкәч музыка ярдәмендә һәркеше белән сөйләшеп, аралашып булуына төшендем. Мәсәлән, китапны аңлар өчен тәрҗемә итәргә кирәк, ә музыка универсаль тел, биредә тәрҗемә кирәкми! Профессиональ рәвештә җыр-моң белән шөгыльләнә башлангач, музыканың төрле халыкларны берләштерүче мәдәни дипломатия икәнен дә аңладым. Искәртеп узам, бүген үземне актер, язучы һәм музыкант итеп хис итәм. Чөнки җырларны иҗат иткәндә син – язучы, аларны сәхнәдә башкарганда – актриса... Ә әлеге юнәлешкә мәхәббәт, мөгаен, 6 яшьтә тугандыр. Нәкъ менә шул вакытта фортепианода уйный башладым, аннары үсмер вакытта беренче җырымны иҗат иттем. Әтиемнең туган көненә багышланган инглиз телендәге музыкаль композиция иде ул!
“Ни өчен әлеге юнәлеш буенча башка илдә белем алу яхшырак?”
Читкә китеп укыр өчен батырлык кирәк, шулай ук финанс ягын да онытмыйк. Әмма бүген мөмкинлекләр бик күп, әгәр теләк бар икән, аларны кулдан ычкындырырга ярамый! Приоритетларны дөрес билгеләү, “Ни өчен әлеге юнәлеш буенча башка илдә белем алу яхшырак?” дигән сорауга җавап табу шулай ук бик мөһим. Чөнки Рәсәебездә дә күп кенә уку йортлары югары дәрәҗәдә эш алып бара. “Безнең хыяллар уңайлылык зонасыннан читтә урнашкан” дигән цитата бар. Сүз дә юк, читтә кыен, моңа әзер булырга кирәк! Мәсәлән, тел ягыннан да проблемалар килеп чыгарга мөмкин, шуңа күрә чит телне яхшылап өйрәнү зарур. Шәхсән үзем 6 телдә иркен аралаша алам. Иң якыннары: инглиз теле – акыл телем, француз теле – йөрәгем теле, ә татар теле –гаиләм теле! Багажымда булган тел белемем миңа чит илләрдә, әлбәттә, ярдәмгә килә. Мин 2021 елда Англиядәге Дарем Университетын тәмамладым. Сәнгать дөньясы белән якынрак нәкъ менә биредә танышасым килде һәм мин ялгышмадым. Төп хыялым – татар мәдәнияте белән чит илдәге кешеләрне таныштыру иде, күпмедер дәрәҗәдә максатыма ирештем!
“Милли киемнәр, җырлар һәм Сәидәнең тавышы аларны таң калдырды!”
Уку буенча йомгаклау эше буларак “Journey of Ozyn көу...” (“Озын көйгә сәяхәт”) документаль фильмынТатарстанда әзерләдем. Ул Арча районында урнашкан Сикертән авылында һәм, әлбәттә, Казанда төшерелде. Биредә Эльмира Кәлимуллина, Сәидә Мөхәммәтҗанова, Ильнар Шәрәфетдинов та катнашты. Интервью алу, оператор эше, монтажлау... барысын да үзем башкардым. Әлеге фильмда инглизләргә татарлар турында гадәти булмаган әйберне күрсәтергә, сөйләргә теләдем. Шул рәвешле «моң» төшенчәсенә игътибар иттем. Ә бит бу шулкадәр уникаль күренеш, чөнки әлеге сүз хәтта башка телләргә тәрҗемә ителми! Дөресен әйтәм, проектны бик ошаттылар. Бигрәк тә милли киемнәр, җырлар һәм Сәидәнең тавышы аларны таң калдырды!
Якын киләчәккә хыяллар һәм максатлар
Үземнең булган белемнәрем белән киләчәктә бүлешермен, уку-укыту эшләре алып барырмын дип уйлыйм. Хәзер дә Музыкаль инициативалар институтында үземнең хезмәтемне тәкъдим итәм, консультацияләр алып барам. Шулай ук үзүсеш белән дә шөгыльләнәсем, татар мәдәнияте турында фәнни мәкаләләр язасым, татар һәм француз телендә Tafra альбомымны чыгарасым килә... Yummy Music лейблы һәм башка музыкантлар белән эшне инде башлап җибәрдек! Алла боерса, барысы да килеп чыгар, иҗат җимешләребезне бөтен дөньяга бүләк итәрбез дип өметләнәм.
Блиц-сораштыру:
- Чит илме яки Татарстанмы?
- Һәр илдә дә тискәре һәм уңай яклар бар, иң мөһиме – хәзер син кайда, шунда гармония табарга!
- Иҗат итү өчен иң шәп вакыт?
- Иртән сәгать 5-6 тирәсендә. Илһам белән тынычлыкта иҗат итәр өчен иң яхшы вакыт, минемчә.
- Иң яраткан ризыгың?
- Татар халык ашларын бик яратам. Шулай ук, ни кызык, карабодай боткасына да битараф түгелмен (көлә).
- Татар эстардасында иң яраткан җырчың?
- Алар икәү: Сәидә Мөхәммәтҗанова һәм Ильнар Шәрәфетдинов. Якыннан белгәнгәдерме, аларның җырларын бөтенләй башкача кабул итәм...
- Һәр иҗат кешесе укырга тиешле 3 китап?
- Төрле әдәбият таныш булырга кирәк, минемчә. Киңәш итәр идем, мәсәлән, “От рунических знаков до языка Вселенной” (К. О‘Хара), “Письма о добром и прекрасном” (Д.С. Лихачев) һәм, әлбәттә, һәр дин өчен изге булган китапларны (Коръән, Библия һб).
Талия Хафиздан киңәш: -
Һәрбер эштә дә эчкерсезлек мөһим... “Бу кешегә кирәкме? Ул башкаларга ошармы? Һәм ни өчен?” кебек сорауларны үз-үзегезгә бирергә курыкмагыз! Тик йөрәгегезгә дә колак салырга онытмагыз!
Илүзә Касыймова