Өй алдына чыккан җирдән язның матурлыгына исем китеп торам. Куралтыларны алсу нурга төреп, читкәрәк салып куйган сап-сары мунча артына кызарып кояш тәгәри. Әнкәем, җаныкаем ялгыз башы дип тормады, тырышты. Мунчасын да салды, дөньясын да тартты... Түбә кыегына тезелгән боз сөңгеләре белән шаярган нурлар, әлеге мунча тәрәзәсенә төшеп, әллә нинди шәмәхә төсләргә керә. Абзар тәрәзәләренә дә пәрдә корылган төсле, аллы-кызыллы шунда. Матур инде, кыскасы. Ә һавасының рәхәтлеге! Үпкәнең төбенә кадәр тутырып сулыйсы килә. Шунда: “Ник бу кадәр тансык, ник бу кадәр сагындырган икән соң бу күренеш”, - дигән уй кагылып китә җанга. Картайган йорт тирәләре, искергән лапасларның матурлыгы ничек моңарчы күзгә ташланмады икән. Ничек шушы гүзәллекне күрми яшәлгән соң әле?! Йөгереп кенә өй эченә кереп китәм. Чоланның кечкенә тәрәзәсенә төшкән яктылык ишек ярыгыннан мине күзәтеп, күз кысып кала төсле артымнан. Үземнең кечкенә бүлмәмә атылып керәм дә хәзерге телефонымны алам имеш. Чукынчык, зарядкасы беткән, 23 % кына калган. Моның белән әллә ни фотога төшереп булмас инде. Кая әле эштән бирелгәне... Инстаграмга, "вконтакте" га куярга матур фотолар ясап калырга иде! Фотоаппарат тагын урынында түгел. Кайда куйганымны исемә төшермәкче булып, олы якка чыккан арада уянып китәм. Телефоннар өстәлдә, камера да урынында. Балачак йортым, кайтыр нигезем, төшемә кергән матурлык кына еракта калган, юк инде бүген. Шунда фотога булса да төшереп керергә дә өлгермәдем бит, ашыгып уяндым ялгыш. .... Күзне йомсам әле дә баскыч төбе, ишек алды күз алдында. Яз көннәре бигрәк еш төшкә керә туган нигез. Кар сулары эреп хатирәләрне уятамы. Әнкәй әзерләп биргән кайнар сулар белән өй алдындагы баскычларның соңгысына кадәр юып, гәлүшләремне җирдәге резин җәймәдә калдырып, сап-сары идән сайгакларга оекбаштан гына басып, кояш нурларында иркәләнәсе килә. #язгакердек #альбинагайнуллина #хатирәләр #төшләр #ташу #язгысаташу #үткәннәрфотогатөшерергәдәшә #жизньвэпизодах #кадрыизпрошлого