Азербаджанская сказка на кубачинском языке. Перевод Амирбега Магомедова
Ливле ужиб сав, ливакквал ужиб сав са бикI гIямчIузив инсан
ГIямчIубикI бук1узив. Ил викьул ужиб сав къаравашли са муцIуй
акквазив савдагарришув.
Савдагар гьакал кьиркьирзив ва укIицIаквазив
инсан ужиб сав. Савдагарре чавалла вевидищив дярхя багъадаже
викьихъул ужиб сав ГIямчIубикI.
Дярхя багъибмутил ГIямчIубикIли
хъил вахьуммутил гIячилла хIякьла муссана дилуккун ужиб сав
ккайиталлажуд дегъуб тIултIе. ГIямчIубикIла люмжа чикаттичиб сад
дихъне дегъуб тIулутIе дукун агужуд.
ГIямчIубикIла лийлеюжиб сай юхъна абалаба. Абалабадил дегъуб
тIултIе бара кIянтIедухахъи гIяшакле динкаттишиб шин чикаттитIул
южиб сай.
Сухъ гьатталчун сини дидигъужуд дегъуб тIултIия ГIямчIубикI
видагул сав хъил. Савдагарра викIел галья вишвидагул сав илццила.
ГIямч1убикI ккушле ужиб сав гьакал, налли тIулутIлиже сусчивилчи
вевидищиб сав.
Бегъуб тIулутI багьнал пакьирра сула бахъуб саб.
ГIямчIубикI цIумукIи вевидищиб сав. Савдагарра гал ГIямчIубикIлиже
чивгьул далайукIудикьле гьаиб сав:
ГIямчIубикI, ГIямчIубикI, Хъаалже мишил сав, Дяхъибниг дуччул сав,
Ччитуже чикигул сав, Щилцце гьайухуб сав.
Абалабадил ГIямчIубикIла, уле кабилсун гали, гьаиб сай:
Дила гал, илттал гьавк1и агага. Итти бигькулади, ГIямчIубикIла
сула бахъуб иццул саб.
Галдил бухале, синна гьавк1ужуд ташагъибле асав, абалабадил
гьаибжуд гъай пикредакьаквал.
ГIямчIубикI х1яси ухуб, няхълиццибзиб бегъуб т1улут1 бинбехиб
сав савдагарра галла бик1ицце. Бехибмале галла бик1 баггьабчиб саб
ганихьардикьле.
Гал виссул аттащу вимдул видагул сав. Савдагарри
тивидугуммале бел чяхук1узив гал, хьайбагъибсав:
Чидил у витайну?
Галдил жуваббакьиб сав:
ГIямчIубикIле витай ук1ул.
Савдагар х1ясиухуб батбидагъибсав синна уй ГIямчIубикIлищу.
ГIямчIубикI, сякьунжуб уй тибидигун, вивижиб сав. Улдил
савдагаррицце гьаиб сав, гал вимди бук1ул.
Савдагарра пикре агул саб,
к1ве-г1ябе духале синдил ГIямчIубикIлицце тиладе бакьиб синщу
сачиб г1як1лу бикадаже витул ватила ибле.
К1ве-г1ябе духуб сад.
Савдагарридил гьибая синна уй батбидагъиб
сав ГIямчIубикIлищу тиладилццила, чикехулдану, галла бик1ья
г1яхбухину, г1ячилже ваш гьаиб. ГIямчIубикI
шаквичиб сав,
садагарридил сини хъям басчибакьи биккул сав ибле, амма илла сал
хьуне либле бужибле асаб.
Налли чарсавхуб сав.
Сухъ ГIямчIубикI гьакал ваццул ужибсав, налли дярхя хъил
вивякьяквал училя духъив вилсунсав. Савдагарридил синна улцце
хъайчибакьиб сав синщу ГIямчIубикI сака ук1ул юргъанне винваккул.
Савдагар гьакал х1ясил ужиб сав ГIямчIубикIли. Налли синна улцце
гьаибсав:
Уща датихьа, дудилал кахьвилану ГIямчIубикI.
Савдагарре т1юмаццила тях1чекигул, кьушмаццилая пяхъук1ул
г1яхле витиб сав юргъанна уккивзив ГIямчIубикI. Савдагарра
пикреагул саб, ГIямчIубикI вибч1иб ухилал сав ибле.
Бара уссилла, рях1ятухилла, ва гьиба ГIямчIубикIла ххамха
вибекъиб вибищила ибле.
ГIямчIубикI витул Савдагар гьакал ваццул
ужибсав, налли ихьвле вилссунсав.
Гьаала либзибсаб, г1ямч1ужуб уй саматле бубк1ак1а бук1узиб.
ГIямчIубикI вибч1иб ужибле асав, юргъаннил виних1яххул, синна
муссана уссунзив савдагар винваккул сав.
Савдагарра палтар чахул, ил
виникавхъун сав къатта. Савдаггарра улцце бяг1янне гьаиб сав,
юргъанне винваккузив ГIямчIубикI вибк1адаже вита ук1ул. Илтаццила
савья вишкиццул юргъан буттадаже т1юмаццила бити бебидищиб саб.
Гьиба тибидигун саб, юргъаннив ГIямчIубикIла муссанав савдагар
ухне.
Агул саб, сибакьи биккулну. Савдагар ккайилла гьак1вичи вихехул
каттилгунсав. Г1яхухубмале савдагар видагул сав судьящу
г1ярзалццила.
Савгъатли судьяй бишгьабалчун сав ттагъвая. Судьядил
ГIямчIубикI синщу сакахъи хъайчибакьиб сав. Илдил гьаиб сав
ГIямчIубикIлицце:
Удил савдагарри биччи биккулсаб 100 манат, я дус илщув
багьааквал викьи биккул саб. Дик1егьабакьа.
ГIямчIубикIла 100 манат титтухадил, къаравашли викьилладе,
ук1ул ужиб сав ил.
Чара аквадихьле налли дус х1якь аквал викьи
савдагаррищув рази ухуб сав ил.
Савдагар х1ясил или, хъилив вататул авлахъла г1ячилже
ватвидигъул ужиб сав.
Пакьир ГIямчIубикI ччавалла вевидищиб дярххя
багъадаже бегутав викьул ужиб сав бац1к1улт1алццила. Сухъ хъу
балсунмутил гъваб силисабил тябяхъиб саб, багьккуб сав ашрапнаддил
биц1ибзиб къык1ва вигьабач1иб саб. Видяхиб абалабащу къык1ва
мутилла бекъиб сав.
Са к1ве-г1яб ашрапе динкаттишиб сав синна
кисана, дасдакьиб сини палтар асси. Сугъунсабил Савдагарра хьунулли
ГIямчIубикIлиццид ашрапне тидидигун сай. Адаме сагъибмале хъил,
илцце гьаибсай:
Лявевач1е адаме, ГIямчIубикIли чиналсабил ххял ас даччиб сав.
Пикребакьа х1илла илла ас квисаберти.
Хьунулла пикре адамили г1яхтакабиццул сав.
Дярххя Савдагарридил ГIямчIубикI щул катул гьаиб сав:
Дила гал, дам булх1унда, у г1яхсив инсан ухне, налли дам
биккулда, удил ас бакьахъи. Ваш хабарте гьалуги. Гьариллидил са-са
ссунк-хабар гьабилгве, чилак1а гьис ссункубзиб висабак1але
идиллидил 100 манат биччидикьле иди.
ГIямчIубикIлидил гьаибсав:
Савдагар. Ду разилда. Амма удил нахе ниссила бакьибзиб лич1аб
к1алцце кабжиб дам гьакка.
Савдагарридил кабжиб налтазиб к1а, бяссун т1уп кьайла
шякьялццила, гъуччикабакьибсав к1алже къулбастеагахъи.
Савдагар, бебидихьа ила ссунк-хабар.
Савдагарре хабар гьалужи вевидищибсав:
Дила аттаттала липпихве хвалазиб къямкъя. Ил кабищи дуналцциб
ккимх баччибзибаде. Веибилли цуппацциб хвалазиб ккимх баччиб
аттаттадил налту къямкъя кабищибзибде.
ГIямчIубикIлидил гьаибсав:
Таманбухи хабар?... а дила аттатта вахъчибх1ыт1алже муттавижиб
веибил ццуппацце чагъиб, ихьтуб диндалалла къахълижиб хвалазиб
ккимх бакьибзивде сик1ал дуналцциджуд хвала къямхъне каттищи.
Ила аттаттадилья, сини алжана биккабну, синна къямкъя нахту
кабищибзибде.
Пикребакьа, кватте хвалазиб ккимх бухи биккулну, 100
къямкъя каттищи агузиб муссалццила.
Савдагар шаквичибсав, ГIямчIубикIлидил гьати ибле, к1виялла
хабарте баражудде ук1ул гьантабаччиб сав илдил гьила вичечи. Илтте
ччаллибикьи бебидищиб саб, маслих1ят бакьахъи судьящу бидагул саб.
ГIямчIубикIлидил либил хабар гьабилгун сав ва Савдагарра к1ая
табдач1ибсав.
Савдагарридил судьяй сухъ ттагъва магаришли бекъибдихьле,
гьибая ттагъва гъайбакьиб сав илдил судьяй эгъахъидикьле: «гьибая
тагъва сакъилану итти, дам бажизиб х1укму бакьа ук1улдикьле».
Судьяжиб ГIямчIубикIла тамаллазиб тахсир чибдихьле, Савдагарри
биккузиб илдил бакьибле асав.
Савдагар, йе ГIямчIубикI
тамал итти вагькубзив асавну,
пяц1вещину бикка йили 100 манат.
Савдагарридил вахт сабалчун ччавал макьин, хъил сагъибмале
хьунуллицце сик1алдихь гьабилгунжила вигьаиб сав:
Айхьунул, ччавал ГIямчIубикI сякьянне ас букъи, гьаа идицце,
адаме вибч1е гьаиб, гьиба вашилалну.
Ччавалла ихьвле ГIямчIубикI сякьюн Савдагарра хьунуллищу
гьаибсав илцце:
Гьаа адамилцце, дам 100 манат гьаккахъи.
Савдагарра хьунуллидил гьаиб сай:
Ва, ГIямчIубикI, Савдагар сса вибч1икьал.
ГIямчIубикIлидил бухале гьаиб сав:
Ва, ду вибк1улле ду вацца ук1ул хъайчебакьибзивдиква иддил.
Бяйкабсиб вибк1уранна хъил ил вингьавхъун сав.
Савдагар
ч1янк1ут1ле киссун ттамхълиже ваччибсав. Видяхиб пичлиже шин
юшкаттагъи читтиццул сав. Хьунул сал хъил йинийидухъуммале илдил
дуц1е шин савдагарриже чикаттит1ул вицци вевидищив сав. Вяук1ул
Савдагар ахъиццулсав.
ГIямчIубикI ццихъле видижи вевидищиб сав
хъваччидихул, гъайья вишук1ул: «Ду авхуддил савдагар вибч1иб
ухиладиква. Дудил ил миц1евакьад. На илдил дам гьибая 100 манат
гьаччибиккузив сав».
Савдагар шаквичибсав, ГIямчIубикIлицце
гьаттахъи ухиллада ибле 100 манат биччиб сав. ГIямчIубикIле
сакъибсав ас синна абалабай.
Абалаба, ма к1е ас, дакьа пакщуд хъулбе, асса хъил
каттихьужудья, ду хъаллакижи биккулдану.
Абалабадил гьаибсай:
Дила гал, ча сакулдин ц1иквай?
ГIямчIубикIле гьаибсав:
5
Абалаба, даммия налла бак1улада. Кабихьа бик1ал т1улут1ья,
сежия чантайле, ду ттавикулда паксий ц1иквай яччи.
Абалабадил, гьаибдикьле т1улут1ья, сежия каттищиб чантай
биччиб сай ГIямчIубикIлицце.
ГIямчIубикI баркалла гьаиб Абалабацце видагулсав арх1ялже.
Дахъе вашибсав, видагъибсав дуццана. Гьакал ваццулсав, ва бухьналла
ухуб сав. Яхле или тибидигун сав х1уз. Палтарья чисяхиб, чяхвихви
кижиб сав. Шинниццил винисавхъуммутил шаквичиб сав, сач1у гьис
чибаквазиб бик1лижид ххял гъис дач1иб. Буссят1 кьякьчикит1ун сав
шинниже. Синна сини вихчивдагул асав, улбе чидукъакъизив
г1юкьязив гал вишиагул сав ил.
Бик1лижид гIямчIудищия
дидахъибсад. Эгъиб сав, х1узла шинна г1яхдище сад ибле.
ГIямчIубикIлидил х1узла шинья деччиб видагулсав. Ц1ябгъдухубсад.
Дуццаниб ц1ябгъле бужиб саб, амма гьихъле шала булх1ун тибле
бужиб саб. Шалатибмусса видагул сав, видагъибмутил шелла хъулбе
даччиб сав.
Хъулбадде винвидухъун видагуммутил са бик1а хъалла
уццалла талай бяжук хьунул кежиб тисегун сай. Бяжуклидил
ГIямчIубикIлицце гьаибсчай:
«Ва, инсанна гал, ила аба йисси кежилалде, удил г1яхсиб бакьибде
ян сякьун. Дила либ ве гал-(дэвов), к1ена сабагъилалсаб ва буккин
гьакка бук1илал саб дицце.
У дудил вец1ила, илтте сабигъналли.
ГIямчIубикIлидил гьаиб сав:
«Ай, юхъна, се абдал гъайну ила. Ила гулатал чач1у ухккуласаб».
Бяжукле пич бик1уб сай ГIямчIубикI
ц1алжив вец1и.
ГIямчIубикIлидил бяг1янне бяжук бяйтал къурткаякьиб, пичле
йинкаяхъыб ва бик1взиб шилкьанна ухаб чикабишшиб сав пичлиже.
Бяжук вяюк1угьия йиккубсай пичлий, хвиссалже чурйижибсай.
Нале
вахтла ццабижид къукъу-ц1алипанталла т1амне дак1ведухъунсад ва
ц1убдихьвлигуд ве гал-(девы) дак1убухъун саб. Илтте хъил бинабхъун
саб ва хьайбагъиб саб.
Ниссила аба сихвину? Яниб инсанна квяг1 либ.
ГIямчIубикIле пикребакьиб сав вивигуллия весилладаибле. Налли
ил виникавхъун гьаиб сав:
Ищила аба шин сакъи йидажи, дамми бухале хъайчибакьай
ищицце гьаахъи: «яне к1ена ве душман сякьюнжубсаб. Ущаддил ве
уххаб к1е хъалта чидукъидихь саб, гьиба душманте хъил
бингьабхъанне, уххабте лак1чекаттакьиб илтте кяхидикьле».
Илтте бихчибдагулсаб ГIямчIубикIла гъайли. Чидекъиб сад хъалта
ве уххаб.
Ай, гуле (дэвы) даше к1ена багькви, уххабтаддил заралбикьулил.
Илтталла хвалеллидил хьайбагъиб сав:
Сугъун булх1и биккулну уххабталла гуж?
ГIямчIубикIле жуваббакьиб сав:
Уща каттицца уццалла тала, салла сали бучче акле, ду бухале
хъалта чавхъун ихьтул са уххаб лак1чекабакьила ищиже. Ищи
иццечаханне душмантаддия иццечаххилал саб.
Габк1ул
липпихва,
девте
г1якьлукамжуб
бихвабук1ул.
ГIямчIубикIли бихчибдагул сик1ал уццалгу кабиццул саб. ГIямчIубикI
хъалта чавхъун сик1ал веал уххаб итталла бик1лиже лак1чикатьтакьиб
сав. Сик1алла бик1лама диникаттичиб сад гьашшедикьле ванзалже.
Чикавхъунмутил хъалтал ГIямчIубикI, сик1ал дэвте бибч1иб баччиб
сав. Гьиба хъулбе дихькви кижибсав.
Са хъилий юкьязий юссе яччиб
сай, кьучмажже ахъиб. Юссе есахъул сав илдил. Гьиба, юссилла
пакдихьли г1яшикь ухуб, или дикка дищиб сав ГIямчIубикIла. Салла
сали илттаддил гъай биччиб саб хъаллакабжи. Илттул муте-асла
ц1иквайли дажижуд сик1абхая дишгьатталчун саб.
Юссилдил гьаиб сай:
«Дила виккана, агъвц1алибил хъилиб тиб чидакьибзиб кьване,
дуккид тид сих1рулла чаханте, ваш наттия дишдукъе нисси».
К1виял бидагул саб ид хъил, таквбакьиб саб кьване, гьатталчунсад
чаханте.
ГIямчIубикIле хьайбагъиб сав юссилцце: «Нисси сагъун
булх1илалдан чаханте сих1рулладухне?»
Юссилдил гьбаибсай:
«Инсанне йиште чахал, вимдул вахьанвихузив сав, ихликьян
гьегъе бидагъиквадикьле».
Илттаддил чахул хаханте бидагулсаб ват1анниже. Агъвц1алелла
хьуне сел ахъиб саб ва ГIямчIубикIла хъил бидагъиб саб.
ГIямчIубикIлидил абалабацце сик1алдихь гьаттилгун сав. Абалабадил
дакьахъиб сай хвала хъулбе, сини ГIямчIубикIле диччибжуд
аслицциала.
Бидагъибмале михъ бакьи х1ядурбихул бебидищиб саб.
ГIямчIубикIла михъ вейилла бикьул катилгунсаб. Илтте букун, буччул,
дахъе г1юмрулццила билкъадаже каттилгун саб. Ущая дукина, дучча,
ва дахъе г1юмру диккул катилжина!