Сёння роўна ў 8.00 у краіне пачалі працу 5510 участкаў па галасаванні на рэферэндуме, у тым ліку 25 – у Крычаўскім раёне. Адной з першых у асноўны дзень галасавання свой выбар зрабіла намеснік старшыні райвыканкама Таццяна Кандраценка.
Яна адзначыла, што важная падзея ў жыцці краіны праводзіцца ў інтарэсах беларускага народа.
- Навошта я прыйшла на рэферэндум? Памятаеце верш Янкі Купалы «Хто там ідзе?»... Для мяне ў ім бачыцца глыбокі сэнс, які непасрэдна звязаны з сучаснасцю, з рэферэндумам, - прывяла аналогію Таццяна Васільеўна. - Чаму я выбіраю Канстытуцыю будучыні? Ні на хвіліну не задумваючыся, адкажу так, «каб больш ніхто і ніколі не спытаў: «А хто там ідзе?» Таму, што наша незалежнасць каштавала нам занадта дорага. Таму, што паважаю памяць аб нашых продках. Таму, што шаную і ганаруся нашай сучаснасцю. Таму, што выбіраю будучыню для сваіх дзяцей. Таму, што Беларусь – гэта наша любімая маці-Радзіма. І я жадаю ёй вечна жыць і квітнець.
Яна таксама звярнула ўвагу на тое, што ў якасцi дапаўненняў у Канстытуцыю плануецца замацаваць за бацькамi абавязак прывiваць дзецям культуру, павагу да законаў, гiстарычных i нацыянальных традыцый краiны. «Але i дзяржава абавязуецца садзейнiчаць усебаковаму развiццю моладзi, ствараць умовы для рэалiзацыi яе патэнцыялу, - дадала Таццяна Кандраценка. - Гэта значыць, што зараз на гэтай нiве трэба працаваць не толькi прадстаўнiкам сферы адукацыi, але i ў абавязковым парадку, – сем’ям, іншым дзяржаўным структурам. Гэты момант вельмi важны, бо павінен быць комплексны падыход да выхавання ўсебакова развiтой асобы. Дадзеная папраўка дасць магчымасць скаардынаваць работу розных ведамстваў i арганiзацый з педагагiчнымi калектывамi для вырашэння галоўнай задачы. Бо ўсiм зразумела, што без маладых патрыётаў немагчыма далейшае развiццё нашай дзяржавы. Актуальны, важны дадатак, якi неабходна, я лiчу, замацаваць у Асноўным Законе».
Яніна МАВІЧ.