Җомга намазын төрле мәчетләрдә укырга туры килә һәм вәгазьләрдә бер нәрсә күзгә ташлана (соңгы 4-5 елда): ни өчендер имамнар мөселманнарны тәнкыйтьли. Иң күп әйтелгән тәнкыйть сүзе хатынны кыйнау темасына. Хатын-кызларыбыз имамнар янына килеп (йә интернет аркылы язып) “ирем кыйный” дип зарлана икән. Бер мәчет имамы хәтта: “безгә мөрәҗәгать итүчеләрнең яртысы диярлек ирләреннән кыйный дип зарланучы хатыннар”, - диде. Туганнарның, хезмәттәшләрнең, күршеләрнең, гомумән, таныш-белешнең гаиләләрен күз алдыннан үткәреп чыгам, берәүнең дә ирем кыйный дип зарланганы юк. Кайбер мөслимәләрдән танышларыгыз арасында “Биш вакыт намаз укучы ире хатынын кыйнап яшәгән берәр гаиләне беләсезме?” – дип сорыйм. “Юк”, - диләр. Монда сүз гаиләдәге низаг турында бармый, нәкъ менә кыйнап яшәү (!) хакында бара.
Дөнья булгач, бәлки “искәрмә”ләр бардыр. Инкарь итеп булмый. Максат та андый гаиләләр юк дип исбатлау түгел. Сәбәп башкада. Хәзер гаилә институтын җимерү бара. Дөньякүләм. Бер яктан салават күпере төсләрен флаг итеп алучылар басып килә, икенче яктан “домаш\нее насил\ие”не бик каты куерталар. Бу сүз куертуның нәтиҗәсе дә бар: Ауропа илләрендә юк сәбәпне бар итеп, хәтта сәбәпсез дә балаларны гаиләдән тартып алулары турында интернеттан укып беләбез. Мөселман гаиләләреннән дә. Имеш, балаларын дөрес тәрбияләмиләр...
Имамнарыбызның мөселманнарны тәнкыйтьләве һич тә файдага түгел. Бигрәк тә “хатыннарыгызны кыйныйсыз” дигән коры тәнкыйте. Вәгазь хикмәт белән сөйләнсен иде. Аллаһ Тәгалә Коръәндә “Раббың юлына хикмәт белән чакыр!” – дип әмер бирә бит.