Гаҗәп хәлләр булып ята Татарстанда! Мөфтиләр ислам дине кабул итүнең 1100 еллыгында баш булу өчен тарткалашып ятканда, татар түрәләре бәйрәмгә үзенчәлекле бүләк әзерләп куйган. Шушы олуг юбилей “хөрмәтенә”, Татарстанның һәр авылында аракы кибете ачылырга тиеш икән! “Татарстанның вице-премьеры Рөстәм Нигъмәтуллин авылларда кибетләр саны азаймасын һәм республикада җитештерелгән исерткеч эчемлекләрне сату кимемәсен өчен, район башлыкларын "бөтен көчне куярга" өндәгән”, дип яза “Азатлык” радиосы сайты.
Эш харап икән бит – узган ел Татарстанда аракы сату нык кимегән, “Татспиртпром”ныкын бөтенләй аз алалар икән. Түрәләрнең әйтүе буенча, моңа авыллар гаепле икән, кибетләре азайган, ди. Шуннан чыгып, Татарстан түрәләре “зур булмаган авылларда республика аракысын сату өчен махсус кибетләр ачылачак”, дигән карарга киләләр. Ягъни, хәтта кечкенә авылларда да махсус кибетләр ачып, Татарстан аракысын лыкынганчы сатачаклар икән...
Бу нәрсә бу?! Нинди мәгънәсезлек һәм корткычлык бу?! Халык аз эчә башлаганга кайгырырга түгел, сөенергә кирәк, чөнки милләтнең яртысы инде болай да эчеп эштән чыкты. Күпме затлы кешеләр, талант ияләре эчеп харап булды, күпме гаиләләр таркалды, балалар ятим калды, рәтле тормыш күрмәде. Хәзер кеше шуны аңлый башлады, кайсы дин сәбәпле, кайсы тәртипле тормыш алып бару хакына, эчүен ташлады. Һәм шушы хәл Татарстан түрәләрен кара кайгыга салган икән, халыкны яңадан сәрхүш ясау өчен, юлларын эзли башлаганнар. Һәм тапканнар. Һәр авыл саен хәмер кибете ачарга! Ипи кибете түгел, ризык, көн дә кирәкле нәрсәләр дә түгел, аракы кибете җитми икән авылларга! Ә ул бичара авылларның күпчелеге татар авыллары бит! Милләтнең карап торган нигезе, кайтып сыену урыны! Хәзер шуларны аракы сазлыгына әйләндерергә җыеналармы? Акча хакына авыллардагы соңгы татаралардан алкаш ясыйлармы?!
Нинди икейөзле син, Татарстан, татар түрәсе! Түбәтәй киеп, “Ислам динен кабул итүебезгә 1100 ел”, дип суфыйланып йөрисең, шул ук вакытта үзең дә лыкынганчы эчәсең, башкаларны да шуңа кысасың. Сиңа бу чир-зәхмәт тә гыйбрәт булмады, тәүбә итмәдең, акча хакына иманыңны сатасың, милләтне дә шуңа өстерисең. Инде бөтен Татарстанны дуңгыз фермалары басты, хәзер шуңа аракы да өстәлсә, безгә пандемия дә кирәкми, халык аягүрә череп үләчәк... Аллаһ сакласын!
Татарстан дин әһелләре, муллалар, имамнар, ислам бәйрәмендә баш булу өчен тарткалашкан мөфтиләр Татарстан түрәләрен бу акылсыз эштән туктатырга тиеш. Татар авылларын тынычлыкта калдырыгыз! Аракы һәм дуңгыз белән аның җанын суырмагыз! Халыкка кешечә яшәргә ирек бирегез, авылларда эш урыннары булдырыгыз, аларны салымнар белән бумагыз! 1100 еллыкны эчкән баштан, кулга аракы шешәсе тотып каршыламагыз! Ислам дөньясы алдында татар халкын оятка калдырмагыз!
Фәүзия Бәйрәмова,
язучы, тарих фәннәре кандидаты.
27.01.22.