Assalomu alaykum qadrli muxlis! Sizlar bilan Olam TV kanali. Ushbu dasturimizda 2021 yilda koinotga qilingan parvozlar sarhisobi haqida soʻz yuritamiz.
2021 yilda koinotga rekord darajada parvozlar amalga oshirildi. Yaʼni koinotga raketa uchirish borasida yangi dunyo rekordi oʻrnatildi. Oʻtgan yilda dunyo boʻyicha jami 144 ta parvoz amalga oshirildi. Parvozlar soni boʻyicha rekord 1967 yildan buyon yangilanmay kelayotgan edi. 1967 yili 139 ta eltuvchi raketa koinot sari parvoz qilgandi.
2021 yilda muvaffaqiyatli parvozlar soni boʻyicha ham yangi dunyo rekordi oʻrnatildi, soʻnggi rekord 1976 yili oʻrnatilgan edi. Oʻsha yili koinotga uchgan 131 ta raketaning 125 tasi orbitaga muvaffaqiyatli chiqa olgan edi. 2021 yilda esa 135 ta raketa koinot sari muvaffaqiyatli parvoz qildi.
2021 yilda Xitoy koinotga eng koʻp raketa uchirgan davlat boʻldi. Xitoyliklar 55 raketani orbitaga uchirishdi. AQSHliklar esa 51 ta. Bu borada uchinchi oʻrin ruslarga nasib etdi. Rossiyaliklar 2021 yilda 25 parvoz bilan cheklanishdi. Butun kosmonavtika tarixida bir yil mobaynida koinot sari eng koʻp raketa uchirgan davlat Sovet Ittifoqi sanaladi. Sovetlar Ittifoqi 1982 yilda 108 ta raketani koinotga uchirishgan.
2021 yilda eng koʻp xizmatlaridan foydalanilgan va yilning eng yaxshi raketasi deb Falcon 9 raketasi tan olindi. 2021 yilda Falcon 9 raketalari 31 marotaba orbita Yer osmoniga koʻtarildi. 2021 yilda Falcon 9 raketalari koinotga 1235 ta sunʼiy yoʻldoshlar va fazo apparatlarini 12 ta fazogirni, umumiy hisobda esa 303 tonna yukni koinotga olib chiqdi. Ushbu yilda Rossiyaning afsonaviy Soyuz raketalari 22 marta koinotga safar qilishdi.
2021 yilda Eron va Janubiy Koreya davlatlari oʻzlarini shaxsiy raketalarini uchirishga urunib koʻrishdi, ammo urinishlar samarasiz yakunlanib falokatga yuz tutdi. Umuman olganda 2021 yilda dunyo miqyosida 9 ta eltuvchi raketa parvoz vaqtida yonib ketdi. Ulardan uchtasi Xitoyga yana uchtasi AQSHga qolgan uchtasi Hindiston, Eron va Janubiy Koreyaga tegishli.