Ҳаётимизнинг дастлабки икки йилида овқатланиш борасида юзага келган одатларимизни катта ёшда ҳам сақлаб қоламиз. Шу боис болага тўғри йўналишни кўрсатиш керак.
Людмила Волкова, тиббиёт фанлари номзоди, РУКТТА диетология ва нутрициология кафедрасининг ассистенти
Бола икки ёшида аста-секин таомнинг суюқ майдаланган шаклиданбўлакчали турига ўтар экан, қаттиқ овқатни фаолроқ татийди ва катта ёшдаги оила аъзоларининг тарелкасидаги нарсаларга қизиқа бошлайди. Бир вақтнинг ўзида гўдак танлашни ўрганади, у алоҳида таомлар ва маҳсулотларни кўпроқ яхши кўради. Бу эса оналар ва бувиларнинг ташвишланиши учун жиддий асосдир.
Таом миқдори
Кўпинча ташвишланиш учун асос бўлмайди. Агар бола жуда кам танновул қилаётгандек туюлса, овқат миқдорига эътибор қаратинг. Бир кун давомида 1,5-3 ёшли бола 1200-1500 граммдан ортиқ бўлмаган ҳажмдаги маҳсулотларни истеъмол қилиши керак. Агар у стол атрофига 4 ёки 5 марта ўтирса, бир марта овқатланишда 300-350 мл таом истеъмол қилиши мумкин. Болангизга нима кўпроқ ёқишини кузатинг: масалан, тушликда битта, аммо ҳажмли гарнирли таом ёки бир нечта таом тури – салат, шўрва, иккинчи таом, нон ва ичимлик, лекин кам миқдорларда. Таом аввалида болага нимани таклиф қилишга эътиборли бўлинг: агар у бир стакан шарбат ичиб олса, тарелкадаги шўрва ва табиийки иккинчи таомга жой қолмайди.
Келишамиз
Болани мажбуран овқатлантириш мумкин эмас, аммо келишиш мумкин. Таомланишга оид ҳатти-ҳаракатлар бўйича мутахассислар қуйидаги маслаҳатни беришади: майда қадамлар билан ҳаракатланинг, сабрли бўлинг, фақат битта муаммога диққат қилинг. Масалан, аввал бўлакчаларни чайнашни ўргатинг, сўнгра мустақил ейишга ўтинг. Бола инжиқлик қилишига тайёр туринг. Албатта, руҳий кўмакни ҳам яратинг: чиройли идишлар сотиб олинг, болани жилла қурса ўйин шаклида таомни тайёрлаш жараёнига жалб қилинг, стол атрофига севимли ўйинчоғини ўтқазиб қўйинг – у ҳам барча билан бирга “овқатлансин”.
Соғлом турмуш тарзи
Болани хилма-хил таомлар истеъмолига ўргатинг. Айнан бир турдаги сабзавотлар салатлар, рагу, сабзавотли шўрвалар шаклида ҳам сарҳил, ҳам пиширилган, ҳам димланган кўринишда бўлиши мумкин. Уларнинг орасида биттаси болага манзур бўлиши тайин. Таомнинг мазасини яхшилаш учун ўткир бўлмаган зираворлардан фойдаланиш мумкин. Овқатга шакар ўрнига мевали пюре қўшиш орқали уни ширин қилса бўлади. Бола макарон ёки сабзавотларни ёқтириши учун эса уларнинг устига қирғичдан пишлоқ чиқариб беришга уриниб кўринг.