Қиш кунидаги сайр гўдакка фойда келтириши учун уни тўғри кийинтириш керак. Бунинг учун нафақат кўчадаги ҳароратни, балки гўдакнинг иссиқлик алмашуви хусусиятларини ҳам ҳисобга олиш зарур.
Биринчи сайр
Агар гўдакнинг терисида йирингли яралар, қизаришлар ва бошқа шикастлар бўлмаса, киндик яраси яхши битаётган бўлса ва участка педиатри бола соғломлигини таъкидлаган бўлса, туғруқхонадан кейин 2-3 кун ўтгач у билан сайрга чиқиш мумкин. Бироқ аввал “бош репетиция” сифатида бир неча маротаба 10-15 дақиқа давомида бола билан балконда тоза ҳаводан нафас олиш керак. Биринчи сайр учун қуруқ шамолсиз кунни танланг. Кўчадаги ҳарорат -5 °Сдан паст бўлмаслиги керак. Биринчи чиқиш учун 15-20 дақиқа етарли. 1-2 ҳафта ичида сайр давомийлиги 2-3 соатгача етказилади.
Гўдакларнинг бурун тешиклари торлиги ва улардан ўтадиган совуқ ҳаво исишга улгурмаганлиги учун 2-ойдан бошлаб то бир ёшгача гўдакни фақат -15 °Сдан паст бўлмаган ҳароратда кўчага олиб чиқиш мумкин.
Сайр учун кийим
Эмизикли болани ортиқча кийим билан ўраб-чирмаш мумкин эмас: ундаги терморегуляция мукаммал эмас ва у тез исиб кетади. Шу боис сайр вақтида бола терлашига йўл қўймаслик керак. Умумий қоидага кўра, гўдакка катта одам кийимидан бир қават ортиқча кийдирилади.
Боланинг яланғоч баданига узун енгли пахта матосидан ишланган футболка, унинг устидан яна биттаси – паҳмоқ ёки ичи иссиқ трикотаж кийдирилади. Белдан пастига трусикча ёки таглик, устидан ползунка кийдирилади. Бошига 2та қалпоқча керак: тагидан пахта матоли ва устидан жун ёки мўйнали. Сўнгра гўдак мембранали ёки синтепонли комбинезонга “ўралади”, оёқчаларида қишки пойабзал ва ғилоф, қўлчаларига эса – мўйнали жун қўлқопчалар кийдирилади. Аравачага жойланган гўдакнинг устига адёл ёпиб қўйинг – у иссиқни яхши сақлайди. Кучли шамол бўлса, албатта капюшон керак.
Гўдакларнинг териси жуда юпқа, нозик ва таъсирчан бўлади. Шу боис совуқ у қадар кучли бўлмаганида ҳам совуқ уриши эҳтимоли бор. Бунинг олдини олиш учун уйдан чиқишдан 15-20 дақиқа аввал гўдакнинг юзларига юпқароқ қилиб болалар кремини ёки косметик вазелин суринг.
Иссиқми ёки совуқ?
Сайр вақтида боланинг қулайлигини кузатиб туриш керак: у исиб кетиши ёки совуқ ейиши керак эмас. Боланинг исиб кетгани ёки совуқ қотганини билиб олиш жуда осон.
Боланинг бурун суяги, бўйни ва кафтларини ушлаб кўриб, унинг совуқ еган-емаганлигини билса бўлади. Қизарган яноқлар ва бурун – унинг аҳволи яхшилигидан далолат. Кичикина одамча музлаб қолмаслиги учун қон юзга келиши керак, яъни яноқчалар қизил бўлиши шарт. Ҳаттоки кучли совуқда ҳам боланинг оғзини шарф ёки рўмол билан ёпиш тавсия этилмайди. Шарф ёки рўмол тезроқ намланиб совиб қолади ва ёқимсиз компрессга айланади. Бундан ташқари, жунли матонинг узоқ вақт тегиб туриши туфайли яноқларда ишқаланиш (контакт дерматит) ҳосил бўлиши, қуришиб қолиш мумкин. Кучли совуқда бўйин ва қулоқларни ёпиш, иссиқ пойабзал ва қўлқопни кийдириш муҳимроқдир, чунки бу жойлар тезроқ совийди.