Рөстәм Нәбиев «Беренче канал»да «Мужское и женское» тапшыруында катнашкан.
Бу хәл 5 апрельдә булган. Ул үзенең язмышы тарихы белән Александр Гордон һәм Юлия Барановскаяга тәэсир итә алуы турында сөйләде.
- Иң дулкынландырганы Юлия Барановскаяның минем турыда сюжет караганда күзләре яшьләнүе һәм тапшырудан соң «мин сине кочаклап алу өчен бөтен эфир буена түздем» диюе, — дип язган Рөстәм. Гордонның да күзләре яшьле булган.
2015 елда Рөстәм Нәбиев армиядә хезмәт иткән вакытта, казарма җимерелү сәбәпле, аякларсыз калган иде. Узган елда ул Эльбруска күтәрелде, шуннан соң онлайн-режимда Русия Президенты Владимир Путин белән аралашты һәм тауга күтәрелүе турында фильм төшерү идеясен белдерде.
29 мартта Нәбиевның Гималай тавын яуларга җыенуы, ә Әмир Абдразаков исемендәге киностудиянең бу хакта документаль тасма төшерәчәге билгеле булды, дип яза Кызыл таң.
Фото: @rustam_nabiev92
Автор: Резеда Галикәева
