Кадер, корбан намазлары бармы?

Галимҗан Баруди “Әд-дин вә әдәб” журналы, 1913 нче ел, 12 сан:

1 сорау: Гали әл-Кариның "Мәудугат" [китаб]ында гавам арасында мәшһүр булган гашура вә рагаиб намазларының асылы булмавы вә ул хактагы хәдисләрнең ялган икәне бәян ителгән. Рагаиб вә гашура намазлары кеби кадер намазы дигән намаз да халык каршында бик мәшһүр вә кылынган намазлардандыр. Бәгъзе вәгазь китапларында кадер киченә хас бер намазның барлыгы сөйләнә вә аңа ибн Габбастан ривәят илә хәдис дәлил итеп китереләдер. Бу хәдис дөресме? Түгел исә кадер намазы исемендәге намазның нигезе бармы?

2 сорау: Корбан гаетендә корбан чалучыга корбанны чалу соңында ике рәкәгать намаз уку илә боералар. Бу намаз нинди дәлил илә исбатланган?

Әнҗәрәдә имам Әфтәх Тәрҗемәни.

1 җавап: Кадер намазы диелгән намаз бу хосуста ибн Габбас хәзрәтләреннән риваят ителгән хәдис мөгътәбәр китапларында күренмәде. Шуңа нигезе булмаган бу хәдискә нигезләнеп бу кичәдә сөннәт дип уйлап махсус бу намазны укымак тиешле булмас. Бидгать булмак ихтималы булганга саклану тиеш булыр. Сөннәт вә бидгать арасында шикле булган гыйбадәтне кылмак тиеш түгел, димешләр. Гыйбадәтләр сөннәттә исбатланган рәвештә рәвеш вә санын арттырмый, киметми генә кылынганда савап өметледер. Мәгәр билгеләмичә яшерен рәвештә никадәр гыйбадәт вә намаз кылса - яхшы булыр.

2 җавап: Корбан намазы диелгән намазның асылы күренмидер. Расүлүллаһның корбан чалган вакытта укыган догасы хәдис китапларында мәзкүр, ләкин корбан намазы укыганы, бу кеби намазның сахабә вә тәбигыйн гасырында булганына күчерү тапмадык”.