Җырчы чираттагы яңа җырын тәкъдим итте. «Кочакладым» дип атала.
«Премьера! «Кочакладым». Яраткан кешеләрегезне кочаклап, бу җырны «отмечать» итегез. Ильмира Нәгыймова көе, Ләйсән Гайнетдинова сүзләре, Артур Җамалетдинов аранжировкасы», – дип язган Ильмира социаль челтәрдәге аккаунтында.
Җыр аның күпчелек виртуаль дусларының күңеленә хуш килгән. «Мәңге тыңлап була», «Йомшак җыр, кабат-кабат тыңлыйсы килә», «Мин бу җырны бик күптәннән көттем», «Җиңел, рәхәт җыр», «Бик нәзәкатьле килеп чыккан», – дип бәяләгәннәр Ильмираның яңа иҗат җимешен.
«Нишләп бөтен җырларыгыз да бер төрле? Чырылдавык көй», – дип, җырны бик үк ошатып бетермәүче дә табылган. Аңа җавап итеп, җырчы ирония белән: «Махсус сезнең өчен, тыңларга ятышлы булсын өчен», – дип комментарий калдырган.
Җыр фонына куелган фотога ишарәләпме, әллә яшь җырчы Марат Яруллин белән Ильмираның «Соңгы бию» җырыннан соң туган имеш-мимешләргә нигезләнепме... «Хәзер инде бу җырның кемгә багышлавың аңлашыла», «Фотода Марат Яруллинмы ул?» – дип язучылар да бар.
Марат үзе: «Маладис, Ильмира апа!» – дип комментарий калдырган. Ильмира да: «Рәхмәт, Марат абый!» – дип елмайган.