Каляды – гэта старажытнае свята калі розныя народы адзначалі зімовае сонцастаянне. Лічылася, як сустрэнеш Каляды, навагодні вечар, такім будзе і ўвес год. Гаспадыні рыхтавалі багатую вячэру. На Каляды людзі вадзілі “казу”, каб на полі быў добрым ураджай, “мядзведзя”, каб у сям’і ўсе былі здаровыя і багатыя, насілі зорку (сімвал дабра і святла).
Грамніцы (Стрэчанне)
У беларускім народным календары свята ачышчэння з дапамогай агню. Яго адметнасць — асаблівы чын асвячэння стрэчанскіх свечак, якія ў народзе называюць грамнічнымі.
Грамніцы лічацца днём першай сустрэчы зімы з летам. Назва паходзіць ад язычніцкага бога Грамаўніка (Перуна) — бога веснавых навальніц і дажджоў, якія спрыялі расліннасці..
З Грамніц пачыналі ўжо рыхтавацца да вясны — гаспадары рабілі, аглядалі, рамантавалі прылады, патрэбныя для вясновых заняткаў («Да Грамніц не скідай з рук рукавіц, а як прайшлі Грамніцы, то ўжо не патрэбны рукавіцы»).
Масленіца– гэта гарэзлівае і вясёлае развітанне з зімой і сустрэча вясны, якая нясе ажыўленне прыродзе і сонечнае цяпло. Людзі спрадвеку ўспрымалі вясну, як пачатак новага жыцця і шанавалі Сонца, якое дае жыццё і сілы ўсяму жывому. У гонар Сонца спачатку пяклі бліны. Нашы продкі верылі, што разам з круглымі, румянымі блінамі, так падобнымі на сонца, яны з’ядаюць часцінку яго цяпла і магутнасці.