Россия саклану министры Сергей Шойгу Россия гаскәрләрен Херсоннан Днепр аръягына чыгарырга керешергә кушты. Бу турыда «Татар-информ» хәбәр итте.
Сергей Шойгу бу хакта Берләшкән гаскәрләр төркеме командующие Сергей Суровикин чыгышыннан соң әйтте.
Суровикин белдергәнчә, Херсон һәм аның янындагы торак пунктлар тиешенчә эшли һәм тәэмин ителә алмый. Хәрби хәрәкәтләр районыннан 115 меңнән артык кеше киткән.
Әлеге ситуациядә оборонаны Днепрның барьер чиге – елганың сул яры буйлап оештыру максатка ярашлырак булачак, дип белдерде Суровикин.
Гаскәрләр маневры якын арада гамәлгә ашырылачак. Шойгу өстәп белдергәнчә, Россия Федерациясе хәрби хезмәткәрләренең гомере һәм сәламәтлеге һәрвакыт приоритетта булып тора.
«Днепрның сул ярында оборона турында карар гади түгел, шул ук вакытта без үзебезең хәрбиләрне һәм гаскәрләр төркеменең сугышчан сәләтен саклап калачакбыз», – диде Берләшкән гаскәрләр төркеме командующие.