Арча районының Яңа Кенәр авылында махсус хәрби операциядәгеләр өчен машинада мунча ясыйлар.
Видеода күренгәнчә, машинаны биек итеп ясаганнар, матур итеп буяганнар. Мунча эче дә уйланып ясалган. Утыра торган урын, салкын су өчен 192 литрлы шакмаклы мичкә, 160 литрлы тагын бер мичкә (анда җылымса су булачак), 70 литрлы кайнар су мичкәсе куелган. Күтәрелә торган ике сәке, шулай ук алынып куела торган идән дә агачтан ясалган, су агып чыгып китү дә каралган. Машина-мунчада запас чыгу урыны да бар.
Мунча эшләү идеясен Гарифулла Әхмәтгалиев тәкъдим иткән. Аңа үзе эшләгән оешма җитәкчесе «Газ-66» машинасы биргән. Машина тәбәнәк булу сәбәпле, трактор ясаучы, җыючы буларак танылган Илфат Сабиров машинаның түбәсен кискән һәм күтәртеп эшләп биргән. Машина әфганчы Рашат Салихҗановның йорты янында тора. Рашат абый мунчаның эчен ясап бетергән диярлек, аңа мәктәп укучысы Әмир Җиһаншин ярдәм итә.
Рашат абый, эшләгәндә җылы булсын дип, мунчага ягып тора.
«Бу изге эштә Радик Хәбибуллин, Таһир Шакиров, Илфат Сабиров, Ленар Гарипов, Илсур Нигъмәтҗанов, Илдар Хәбибрахманов, Илназ Сафин, патриотик рухта тәрбияләнгән эшмәкәрләр дә ярдәм итеп тора», – диде ул. Хәрбиләргә мунча ясау өчен машина биргән оешманың җитәкчесенә, бу эшне башлауда ярдәм иткән өчен Арча районы башлыгы Илшат Нуриевка рәхмәт әйтте.
Мунчаны 18 февральгә ясап бетерергә һәм хәрбиләргә 23 февральгә илтеп тапшырырга планлаштыралар. Рашат Салихҗанов, машина-мунчаны махсус хәрби операциядә катнашучыларга тапшыру өчен, үзе дә барачак.
Халык ярдәме белән мунча кирәк-яраклары сатып алырга җыеналар. Шулай ук мунчала бәйләп китерү, себерке алып килү дә хуплана, бераз утын да салып алып барырга уйлыйлар. Әлбәттә, машина буш бармаячак, авылда яшәүчеләр бәрәңге, кишер, озак саклана торган азык-төлек, җылы киемнәр дә китерә.
Илдар Шәмсетдинов гуманитар ярдәм җыю пунктына телефон кую өчен агачтан ясалган 44 җайланма китергән. Аны сатудан кергән акча шулай ук хәрбиләргә кирәк-ярак алу өчен тотылачак.
