Чаро Formula55 Темур Раҳимовро варзишгари сол интихоб кард?

Соли 2022 барои варзишгарони Тоҷикистон соли бад намуд, аммо дар миёнашон истеъдод ва ҳунари ҷаҳонпаҳлавон - Темур Раҳимов нишон дод, ки ӯ арзандаи ин унвон аст. Темур Раҳимов дар соле, ки сипарӣ шуд, сарҳади дастовардҳои варзишии кишварро убур карда, исми худро бо ҳарфҳои заррин дар таърих навишта кард. Аввал он, ки ӯ аз зумраи нахустин гӯштингири тоҷик шуд, ки дар феҳристи раддабандии ҷудои ҷаҳон миёни сангинвазнҳо рақами як гардид. Барои мавқеи худро дар ин зина нигоҳ доштан Темурро зарур буд, ки дар мусобиқаи оянда натиҷаи баланд нишон дода, бо ба даст овардани имтиёзҳои зарурӣ солро ҳамчун ҷудокори рақами яки ҷаҳон ҷамъбаст намояд ва ҳамин тавр ҳам шуд. Қаҳрамони матлаби мо ҷамъоварии медалро аз сайри ҷаҳони ҷудо оғоз карда. моҳи феврали соли 2022 дар “Tel Aviv Grand Slam 2022” нишони биринҷӣ ба даст овард. Баъд аз пойтахти Исроил паҳлавони мо дар “Antalya Grand Slam 2022” низ ҳунарнамоӣ карда, он ҷо низ нишони биринҷӣ ба даст овард. Баъд аз ду нишони биринҷӣ Темур каме дар баромадҳои хеш истироҳат эълон кард. Баъдан ба Чемпионати Осиё сафарбар шуд ва нишони нуқраро ба гардан овезон кард. Моҳи октябри соли 2022 ҷудокорони кишвар ба Чемпионати Ҷаҳон шаҳри Тошканди Ӯзбекистон дар ҳайати 9 нафар сафарбар гардиданд, ки Темур яке аз довталабони асосии вазни сангин барои мақомҳои ифтихорӣ гуфта мешуд. Аммо ӯ дар ниҳоят панҷум шуд. Баъд аз 10 рӯз дар Гранд Слами Абу Дабӣ (АМА) Темур бохти худро дар Чемпионати Ҷаҳони ҷудо ҷуброн кард ва медали биринҷӣ ба даст овард. Темур Раҳимов бори аввал дар таърихи ҷудои Тоҷикистон дар “Baku Grand Slam 2022” медали тиллоро ба гардан овезон кард.

Ин аввалин медали тиллои ҷудочиёни кишвар дар мусобиқоти Grand Slam мебошад. Ин дастоварди таърихӣ аз ҷониби Раиси шаҳри Душанбе -Рустами Эмомалӣ беҷавоб намонд ва ба ӯ манзили истиқоматӣ дар пойтахти кишвар тӯҳфа кард. Дигар паҳлавонони кишварҳо мавқеи Темурро дар раддабандии беҳтаринҳои ҷаҳон танг мекарданд ва барои варзишгари мо ҷамъоварии имтиёз чун обу ҳаво лозим буд. Маҳз ин омил Темур Раҳимовро маҷбур сохт, то дар мусобиқаи ситораҳои ҷудои ҷаҳон дар Йерусалими Исроил (Jerusalem Masters 2022) барои зинаҳои ифтихорӣ муборизаи боз ҳам сангинтарро анҷом диҳад. Дар ниҳоят Темур бори сеюм дар мавсим аз намояндаи Ҷопон - Кокоро Кагеура дар финал мағлуб шуд ва дар ниҳоят зинаи дуюмро ишғол намуд. Темур Раҳимов соли 2022-ро бо се дастоварди таърихӣ, ки бори аввал дар ҷудои тоҷик рақам зад, ҷамъбаст намуд. Ин нишони тилло аз Гран Слам, нуқра аз ситораҳои ҷудои ҷаҳон (Masters 2022) ва ишғоли зинаи аввали рейтинг дар вазни 100+ буд. Чунин дастоварду нишонҳои зарринро намешавад, сарфи назар кард. Темур воқеъан ҳам арзандаи ин ҷоизаи пурнуфуз дар кишвар буд.

Бар замми ин Ширкати миллии букмекерии Формула55 барои амалӣ гаштани орзуҳо ҷаҳонпаҳлавонро пайваста дастгирӣ менамояд. Аз ҷумла соли 2022 ба Темур Раҳимов ду маротиба дастгирии молиявӣ намуд ва дар ин замина боз толори тамринии ӯ дар доираи лоиҳаи “Орзуи нек”-и Формула55 таъмиру азнавсозӣ карда шуд. Агар ин дастгириҳои мо низ заррае ҳам барои рушду пешрафт ва натиҷаҳои Темур саҳм гузошта бошанд, пас мо сарфарозем. Ҳадафи мо низ дар самти дастгирии варзишгарони кишвар маҳз ба он хотир аст, ки онҳо дар мусобиқаҳои байналмилалӣ муаррифгари давлату миллат бошанд. Темур роҳи пурмашаққати худро барои расидан ба ҳадафҳои навбатиаш, ки ин соҳиб шудани медалҳои заррин аз Чемпионати ҷудои ҷаҳон ва Бозиҳои тобистонаи олимпӣ мебошад, идома медиҳад ва Формула55 ӯро дар ин роҳ ҳамраҳӣ менамояд.