Бұл кітап басынан бір-бірімен байланыспаған фактілерді үсті-үстіне баттастырып, арасында әзіл қосып, ғалымдардың зерттеулерін теріп жазылған дүние боп көрінуі мүмкін. Ойыңызды авторлар да мойындайды, кіріспесінде. Бірақ, кітапты кіріспеден бастамауды мектепте қалыптастырып алған мен оны қайдан білейін?!
Сонда кітап не жайында?
Адамдардың күнделікті байқамаған іс-әрекеттерінің салдары жайында. Мәселен, дәрігерлердің қол жуу әдеті мен бала өлімі арасындағы байланысты көрсетеді. Немесе феминизм дамуы мектеп мұғалімдерінің орташа білім деңгейінің төмендеуіне әкеп соққанын туралы жазады. Әлбетте, бұл феминизмді айыптау емес. Жалпы, бұл азаматтар ешкімді және ештеңені айыптамайды. Олар тек барды бар деп көрсетеді. Алайда, олардың бұл жазғандары биліктің немесе қоғамда қалыптасқан көзқараспен үндеспеуі мүмкін. Осынысымен қызық. Сіздерді айналадағы болып жатқан өзгерістер мен ақпарат ағымына өзгеше көзқараспен қарауды үйретеді, құбылыстарға сараптама жасауға шақырады. Кітап осындай ойламаған зерттеу нәтижелерімен қызықты болмақ.
Және бір маңызды деталь — кітап авторы өзін экономистпін деп таныстырады, алайда жазғаны статистиканың қолданылуы және оны тәпсірлер туралы.
Егер пайдалы болса, неге кез келген адамды қызықтыра қоймас?
Себебі, авторлар кей сәттерде детальдарға тым көп мән береді. Чикаго мен Бостондағы жезөкшелерге шамаман 30 парақты арнаса керек. Ал жаһандық жылыну процесі жайында жазғанда жалпақ жұрт маңызды емес деп тапқан дүниелерді баяндағандай болды. Айтпақшы, бұл кітап жылыну үдерісінің үлкен мәселе емес һәм оның шешімі табылғаны туралы жазады. Шынымен де, табиғат ана (яки Пинатубо жанартауы) беларусьтік Булыдько ғалымға үлкен ой салып, оны Бил Гейтстің бұрыңғы кеңесшісі іліп әкетіп, қарапайым механизм негізінде әлемді құтқарар дүние жасаған-ды. Кітапта толығырақ.
Иә, егер Грета Тунбергке бұл кітаптың соңғы 40 парағын апарып беретін адам бар ма жалғанда?!
Жә, қорытындылай келе, егер де 8 сағат уақытыңыз (300 бет, сағатына шамамен 36 парақ) болса, һәм әлемдегі болып жатқан құбылыстарға экономист/статист көзімен қарағыңыз келсе, онда әлбетте оқыңыз. Алайда, басыңызды ауыртып, шаршатып жіберетін дүниелерге де дайын болыңыз. Бұл, әрине, менің көргенім.