"Бу мәсьәлә – бик гади язылуы, кайбер адәмнәрчә, гаеп саналырлык булса да, дөрес, мөһим мәсьәлә, дөнья ләззәтләренең берсе. Дөньяның ләззәтләренә диккать итсәгез, чын карау белән карасагыз, хакыйкый ләззәт тапмассыз. Бар да – зарарны кире кагудан яки җәфа катыш бер хыялый ләззәт. Йокы иң рәхәт, иң ләззәт бирүче бер хәл булып, ләззәте кайвакытта булу мәсьәләсе әдипләр арасында булмый торган бәхәс ки, вакытында аңлау юк, соңыннан үткән, алдында ирешү юк. Бәс, ләззәтләнү, кайвакытта җавабында: “Чын ләззәт юк, бәлки, зарарны кире кагу җенесеннән бер рәхәтлектән гыйбарәт”, – диюләрдән башкача җавап юк.
Кайбер оста сүзле кешеләрнең: “Дөньяда нәрсәләрне тели?” – соравының җавабында: “Бик кысталган вакытта рәхәтләнеп бушану”, –дигән җавабына ни әйтерсең яки: “Бик кычыткан җирне кашу”, – дисә яки: “Бик ачыкканда өстенә тоз сипкән арыш икмәге”, – дисә, кабул итмәскә чара бармы?
Дөньяның бар ләззәте дә бөтенләй кирәклеккә карап кына йөри. Шәкертләр әйтмешли, игътибарга лаеклы әмер яки шуңа якын. Чын ләззәт булса, аерма булмаска тиеш. Дөньяда мондый ләззәт юк, һәркайсы хажәт вакытта бер дәрәҗәдә ләззәт бирә, туйгач, бар да сөйкемсез күренә. Байлар кайбер вакытта: “Алтын, җәүһәр болай түгел, ләззәт бирә, туйдырмый”, – диярләр. Моңа шәех Сәгъди философның мәкаләсе канәгатьләндерерлек җавап бирә:
Бер дәрвиш сәяхәтендә чүлдә бик ачыккан. Ахыргы хәлгә якынлашканда алда кечкенә капчык белән бер нәрсә күргән. Ерактан бөртекле нәрсә булып күренгәннән, бодай бөртеге дип уйлап, гадәттән тыш куанган. Кем белер, Аллаһка никадәр шөкранәләр кылгандыр. Кулына алып, капчыкны чишеп караса, җәүһәр, вак ташлар, энҗеләр булып, элек күренешендәге шатлыгы кадәр көенеч пәйда булган. Хәзер ул җәүһәрләр ничә миллионлык асыл ташлар булгандыр. Ләкин моның ачлыктан саклауда һич файдасы юк: һәлак һәм үлемнән коткармый, чүлдә сатып алучысы юк. Ни япсын, “җәяүлегә янчык авыр” дигәнчә, җәяүле ачка бу янчык бигрәк тә авыр тоелган да, бәлки ташлап киткән".
Баруди Г. Хатирә дәфтәре.
Барудиның сүзләре ошаса, "лайк" (баш бармакны өскә) куегыз!
Г. Баруди чәй турында да кызыклы фикерләр әйткән: https://zen.yandex.ru/media/id/5eeb7eb6e0d57b0e43ff4624/g-barudi-dres-itep-chi-ech-turynda-5efdbcf62c6b024bbccc70bb