Шундай қаттиқ шапалоқ тушдики, боши билан бориб эшикка урилиб, кўзидан искра чиқиб кетди.
Бу оғриққа чидолмай, хўрланиб йиғлаб юборди.
— Parasini aldikdan sonra dedigimi yapman lazim Hayir oyle yapmam diyosun Orospular icin para her seyi haleder (пулини олгандан кейин этганимни қилиш керак, ўзингча «йўқ ундай қилолмайман» дейсан, фохишалар пул учун любой ишни қилади). — деб, ерда йиғлаб ётган аёлга 100$ ташлаб , хонадан чиқиб кетди бир киши.
Пулни қўлига оларкан, хонани кузата ўрнидан тура бошлади. Полда ётган ички кийимларини, стулда турган кожанный калта юбкаси-ю, олди очиқроқ кофтасини олиб кроватга ўтирди.
Туркияда у ёлғиз эди. Ўзига ўхшаган бир неча аёллар билан ижарага уй олиб туришар эди. Уйга бориб, дугонасига кўзи тушди. Айнан шу дугонаси, бу йўлни танлашга ундаган эди. Тинчгина бир кампирга қараш учун келган бу аёл, аввал 2 ойча кампирга қараб, ойига 400$дан маош олган. Дам олиш куни айланиб юрганда дугонаси билан танишиб қолган. Дугонаси бунақа пулларни 3-4 кунда, нари борса ана бир хафтада топаётганини, барибир ҳеч ким танимаслигини, турклар ўзбек оппоқ аёлларини яхши кўришларини, кампирга қийналиб қараб, сассиқ памперсларини алмаштириб юриб биииир ойда топаётган пулларини онсон йўл билан топишга жалб қилган.
Дугонасидан нафратланиб кетди. Ўзидан жирканиб кетди. Ваннага кириб кетиб, сувни тўлдириб, ичига тушиб олиб, анча йиғлади.
Фохишаликдан олдин, тинчгина кампирга қараб, хамма шароити бор ўша уйда яшаб юрган пайтларини соғиниб йиғлади.
Туркияга келишидан олдин, ота-онасининг уйида, икки ширин қизалоқларини мактабдан келишини кутиб ўтириб, бирга дарс қилишларини қўмсаб йиғлади.
Суд пайтида, прокурор саволларига катта опалари ўргатган ёлғон жавобларни берганига йиғлади.
Судни қарорига кўра, эрини 3 ойга қамалишини эшитиб, «баттар бўл» деган тилларини тишлаб йиғлади.
Ўз уйида, қизлари ухлаётганда, эрини ишдан келишини кутиб, эртага тўйга боришга кийми йўқлигини айтиб, эридан мошина арендасини пулини бериш вақти келганини, ҳозир имкони йўқлигини эшитгач, жахли чиқиб кетиб, текказиб — қанақа эрга тегдим, эр бўлиб битта кўйлак олиб беролмаса, эх мани фалончи бойни ўғли оламан деган, ман ахмоқ йўқ деб ўтирибман-а — деб айтган гапи учун, эридан тушган шапалоқдан, опасига телефонда эридан шикоят қилиб, келиб олиб кетишлигини сўраганидан минг афсусланиб йиғлади.
Анча йиғлади.
Ваннани эшиги тақиллади.
— Нима?! — йиғлаётганини билдирмаслик учун, баландроқ овозда жавоб берди.
— Лейла қўнғироқ қилди, ану сани севиб қолган Серкан келиб сўравотганакан, у кетди бугун бошқа ишламайди деса ҳам, икки баробар бераман пулини деб Лейлани тинч қўймаяптикан, чақирвотти, нима қиласан?!
— …
— Гапир, нега жимсан?
— …
— Ўлиб қолдинми?!
— Ҳозир бораман…
Тошкент, 28.11.2015й.