— Жонга тегди! Қачонгача фалакдан қўрқиб, ер остида яшаймиз?! — дебди бир йирик чувлчанг.
Ён-атрофдаги чувалчанглар хайрон қолиб, ёши каттароғи гап бошлабди.
— Нималар деб валдираяпсан?
Йирик чувалчанг секин судралиб, қаддини ростлаб:
— Нега биз фақат ёмғирда ер устига чиқамиз? Қачонгача қўрқиб яшаймиз?! Бас, энди фалакдан қўрқмаймиз!
Чувалчанглар орасида шовқин кўтарилиб кетибди.
Оқсоқол чувалчанг ҳаммани тинчлантириб, жахл билан қаҳрамонликка интилаётган чувалчангга қараб:
— Биз ёмғирдан кейин чиқишимиз бу маскировка, ер усти хўл бўлгани учун фалакдаги қушлар танамиз устидаги суюқликни фарқига бормай қўяди.
— Буларни биламан, лекин биздаги буюк хислат ҳеч қайси мавжудотда йўқ!
Чувалчанглар бу нима демоқчилигин тушунмай яна шовқин кўтариб юборишди.
Қаҳрамон чувалчанг катта мажлис қилишини, унга озодликни истаган ҳар бир чувалчанглар келиши мумкинлигини айтибди.
Мажлис ер остида эмас, балки устида ўтадиган бўлибди.
Жуда кўп чувалчанглар йиғилибди, хатто ўзга қабиладагилар ҳам бор экан. Аммо озодликни истасалар ҳам, хатардан қўрқиб тошлар, шох-шабадалар тагига беркиниб олишган экан.
Фақатгина биргина қаҳрамон чувалчанг тош устида минбарда тургандай, ғурур билан гап бошлабди.
— Чинакам озодлик бу — ўлимга бўлган қўрқувни енгиш. Яъни, қаерда, қандай холатда бўлса ҳам, фалак қурбони бўлишимиздан қўрқмасликдир.
Чувалчанглар бир фалакка, бир қаҳрамонга мўралаб қўяр эди.
— Ахир қаранглар биз қандай буюк мавжудодмиз! Бизда аёл ёки эркак деган тушунча йўқ, биз хар биримиз туғиш-туғдириш хусусиятига эгамиз. Гермафродитизм қонимизда бор!
Чувалчанглар — хууув! - деб юборишибди.
— Фақатгина бизда регенерация бор! Фақат биз ёқотган тана аъзоларимизни қайта тиклаб, ўстириб олишимиз мумкин!
Чувалчанглар — хаааааа! - деб чапак чалиб юборишибди.
— Хатто вақтимиз келиб, вафот этиб чириб кетганимизда ҳам, биогумус, кучли органик ўғитга айланамиз!
Чувалчанглар ғурурланиб — биз шундаймиз! - деб бақириб юборишибди.
— Чиқинглар ер устига эй буюк мавжудодлар! Биз энди фалакдан қўрқмаймиз! — деб турган пайт, осмондан бир мусича шартта қахрамон чувалчангни илиб кетибди.
Жим-житлик. Тошлар, шох-шабадалар тагида бир дона ҳам чувалчанг йўқ.
Улар ер остида, хамон ёмғирни кутиб яшашар.
Тошкент, 31.05.2015 й.