Бер король үз дәүләтендә яхшы сүз әйтүчегә 400 динар бүләк билгели. Шулай бер көнне ул биләмәсен карап өйрәгәндә агач утыртучы бер картны очрата.
- Бу зәйтүн агачы 20 елдан соң гына җимеш бирәчәк. Син бик карт, аның җимешен ашый алмаячаксың.
- Әүвәлгеләр утыртып калдырган – без ашадык. Без утыртып калдырабыз – киләсе буын ашар.
- Яхшы сүз әйттең! Сиңа – 400 динар!
Карт елмая.
- Ник елмаясың?
- Зәйтүн агачы 20 елдан соң җимеш бирә, минеке – инде җимеш тә бирде
.- Яхшы сүз әйттең!
Картка тагын 400 динар бирәләр. Ул тагын елмая.
- Ник елмаясың?
- Зәйтүн агачы елына бер тапкыр гына җимеш бирә, минеке – ике тапкыр бирде инде.
- Яхшы сүз әйттең!
Король картка 400 динар бирә дә шундук китеп бара. Гаскәр башлыгы: “ Ник шулай ашыгып китеп бардың?” – дип сорый. Король:
- Иртәнгә кадәр сөйләшеп утырып була бу карт белән. Безнең малыбыз бетәчәк, аның сүзе бетмәячәк.
ИБРАҺИМ СҮРӘСЕ (Ногмани тәфсире):
24. Беләсеңме "Лә Иләһә Илләллаһ" сүзенә Аллаһ нинди гаҗәп мисал китерә, ул сүз яхшы үскән агач кеби, аның тамырлары җирдә мәхкәм, ботаклары күккә үрелгән, Раббысының әмере белән җимешене һәрвакыт биреп торыр.
25. Аллаһ бәндәләренә шундый мисалларны китерә, гыйбадәтләнеп вәгазьләнсеннәр өчен.
26. Вә диндә дәлилсез ялган сүзнең мисалы: тамыры белән чыгарып җир өстенә ташланган һичбер нәрсәгә яраксыз начар агач кеби ки, һичнәрсә бирми, батыл дин дә шундыйдыр.
27. Иман китереп хак диндә булган кешеләрне Аллаһ дөньяда вә ахирәттә дәлил белән сабит булган "Лә Илаһә Илләллаһ" сүзенә беркетер, әмма иман китермәгән залимләрне Аллаһ адаштырыр, Аллаһ теләгән эшне кылыр.