8 лютага ў Баранавічах прайшоў фестываль хрысціянскай музыкі “Дастукацца да нябёсаў”. Фэст праводзіцца ўжо IX раз і збірае моладзь з усёй Беларусі.
Упершыню фестываль адбыўся ў 2012 годзе ў Астраўцы, затым – у Гудагаі, а з 2014 года кожны год праводзіцца ў Баранавічах на сцэне мясцовага ДК “Тэкстыльшчыкаў”.
У гэтым годзе на фестывалі выступілі чатыры хрысціянскія гурты: “The Crossway» (Баранавічы), пратэстанцкія гурты “Новое поколение” і “Слово Жизни”, а таксама евангелізацыйны музычны праект “Рыбы”.
Хоць фестываль і лічыцца хрысціянскім, але арганізатары падкрэсліваюць, што запрашаюць сюды ўсіх.
“Чаму мы не робім гэты фэст, напрыклад, у царкве? Бо тут (у ДК – МВ.) у чалавека адразу няма псіхалагічных бар’ераў. А далей – няхай Бог робіць сваё. Мы – толькі маленькая пясчынка ў гэтай справе”, - заўважае арганізатар фестывалю ксёндз Павел Рудзьман.
Кожны год фестываль праходзіць па-свойму. Сёлета, на думку святара, музычны марафон “нарэшце стаў малітвай”.
“Думаю, гэты фэст быў бы добрым пераломным крокам для чалавека па-іншаму паглядзець на веру”, - дадае ксёндз Павел.
Фестываль наведваюць людзі розных узростаў, але найбольш на ім, канешне ж, моладзі. Гэта маладыя католікі, пратэстанты і праваслаўныя з розных куткоў Беларусі.
“Я другі раз на фестывалі. Пасля першага вырашыла, што ніколі не хачу яго прапускаць, таму што столькі ўражанняў і эмоцый у мяне яшчэ нішто не выклікала. З першай малітвы адчула супакой. Пасля такіх фэстаў хочацца змяняць свет вакол сябе, але пачынаць змяняць – з сябе”, – падзялілася ўдзельніца фестывалю Марыя з Баранавічаў.
У музычным плане на “ДДН” выконваюцца песні ў розных стылях, але хрысціянскай накіраванасці. Гэта спевы, у якіх прасочваецца тэма пошуку Бога, узаемаадносін чалавека з Ім, а таксама праслаўленне і падзяка Богу за дар жыцця і шматлікія іншыя тэмы.
Кожны год “Дастукацца да нябёсаў” наведвае біскуп Пінскі Антоні Дзям’янка. Каталіцкі іерарх вітае моладзь і ўдзяляе пастырскае благаслаўленне.
Фестываль – гэта не толькі адпачынак і малітва праз спевы, але таксама – магчымасць зрабіць дабро. Напрыклад, сёлета, удзельнікі фэсту маглі далучыцца адразу да дзвюх дабрачынных акцый – збору сродкаў на лячэнне цяжка хворай дзяўчынкі Сафіі Жагунь, а таксама – на развіццё інклюзіўнага фестывалю “Вясёлка талентаў”. Кожны удзельнік мог ахвяраваць пэўную сумму на гэтыя добрыя справы. Дарэчы, далучыцца да збору сродкаў і зараз можа любы жадаючы.
Для ўдзельнікаў фэсту ў холе ДК працавала фотазона, дзе можна было зрабіць фота на фоне лагатыпаў ДДН 2020; міні-кафэ з кавай, гарбатай і рознымі смачнасцямі, а таксама шматлікія зоны з сувенірнай прадукцыяй фестывалю. Акрамя гэтага, усе, хто хацеў болей пазнаёміцца са Святым Пісаннем, маглі бясплатна ўзяць сабе Біблію, звярнуўшыся да валанцёраў фестывалю.
Марына Валасар, фота аўтара