Кеше ни әйтер...
⠀
Мондый кием кимә инде,
Кеше ни сөйләр.
Күкрәгеңне ачыбрак куй,
Шулай йөриләр.
⠀
Туйларны да зурдан итик,
Күршедән оят.
Ничек инде никах кына,
Мәжлес мул кирәк.
⠀
Машинагыз бигрәк иске,
Кеше көләрлек.
Иномарка алыгыз сез,
Кредитка кереп.
⠀
Кеше әйтә кебек инде
Фатиры юк, дип.
Ипотека ала яшьләр
Ә без кемнән ким?
⠀
Телефоным айфон түгел,
Кытай искесе.
Эштәгеләр кырын карый,
Ничек йөрисе?
⠀
"Балаларың тәрбиясез,
Йөгереп йөриләр.
Күршеләрнең оныклары
Вәт тәртиплеләр"👍
⠀
Бигрәк баеп киттең тагы,
Адәм көлкесе.
Мескеннәргә ярдәм ит син,
Болай йөргәнче.
⠀
Алай итмә, болай ит син,
Башкалар кебек.
Кеше төсле яшәргә бит!
Юк, алай түгел!
⠀
Үз тормышым түгел миндә,
Нишләргә хәзер?
Эх, бер яшисе иде-
Кеше ни әйтер?
