Рәсим хәзрәт Хәбибулла
Сорау:
Коръәнне бер генә кеше өчен чыгалармы, әллә ике-өч кеше өчен чыксаң да буламы?
Җавап:
Сорауда Коръәнне тулысы белән укып чыгуны бер генә кеше өчен чыгаргамы, әллә берничә кеше өчен укып чыксаң да ярыймы икән кебек эчтәлек ята бугай. Без теләсә кайсы сорауга җавапны бары тик Коръән һәм Сөннәттән генә эзләргә тиешбез. Шуның өчен мөхтәрәм мөселман кардәшләребез, әйдәгез Аллаһының Китабына мөрәҗәгать итик әле. “Берәүнең сәвабы да гөнаһы да икенче кешегә бирелмәс. Һәр кеше үзе кәсеп иткән нәрсәсен генә алыр”. (Ахирәт көнендә. Р.Х.) (53. 38;39.) Менә шушы аятьләрдә Аллаһы Тәгалә безгә ап-ачык итеп аңлатып бирә, бер кеше икенче кеше өчен савап та, гонаһ та эшли алмый. Әмма Кеше икенче бер кешене саваплы яисә гонаһылы гамәлләр кылырга чакыра ала. Мисал өчен бер кеше икенче кешене намазга басарга чакырып вәгазьләр сөйләргә мөмкин, яисә киресенчә бер кеше икенче кешегә кабахәтлек кылырга котыртырга да мөмкин.
Кадерле мөселман кардәшләрем, мөхтәрәм милләттәшләр! Шушы дөньяда һәр кеше үзенең кылган гамәлләре өчен я савап, яисә гонаһка ия булырга мөмкин. Шулай булгач, Коръәнне дә тулысы белән укып чыгуның савабы, бары тик укыган кешегә генә була. Әгәр инде Коръәнне тулысы белән укып чыгучы, “шушы укыганымны фәлән кешегә багышлыйм”, дисә, Коръән укучының үзенә дә, фәлән кешегә дә савап булмый. Кеше дигәнең бигрәк кызык инде, берәү кеше талап, кеше кыйнап йөри дә, кемнәндер үз исеменә Коръән тутыртып Ахирәттә дә җәннәтле буласы килә. Һәрнәрсәне базар таварына әйләндереп бетерделәр, хәтта Аллаһының безгә олы бүләге булган Коръәнне укып та акча эшләргә уйлаучылар бар. Алай гына түгел, бермәлне Казан урамнарында Коръән тутырылганга язулар сатып йөрүчеләр дә пәйда булдылар. Нәтиҗә ясап шуны әйтә алабыз, Коръәнне һәр кеше бары үзе өчен генә укый һәм тутыра ала. Әгәр Коръән укыган вакытта янәшәсендә бер кеше ихлас күңел белән тыңлап утырса, аңа да күпмедер дәрәҗәдә савап була. Кабатлап әйтәбез, Коръән мәетләр өчен дә, тереләр өчен дә тутырылмый, әгәр кем тутыра икән, ул гонаһыдан башка нәрсә эшләми, чөнки Аллаһының Сүзен инкаръ итүче була. Әрвахларга укылган Коръән савабы бармый, аларга Коръән укучының, яисә туганнарының, балаларының кылган догалары гына бара. Шуның өчен һәрбер мөселман кешесе үзе белгән Коръән сүрәләрен укып, соңыннан вафат булган кардәшләренә, әти-әниләренә дога кылса, иншәэАллаһ, догасын Аллаһ арвахларга ирештерер. “Ни өчен алдан Коръән укырга соң?” – дигән сорау туарга мөмкин. Чөнки Аллаһы Тәгалә колларының Коръән укыганнарын ярата, башта Аллаһ яраткан гамәлне кылып, Аның рәхмәтенә ирешәбез дә, үзебезгә нәрсә кирәк шуны һәм арвахларыбызга дога ирештерүне сорыйбыз. Үзен мөселман, дип санап йөрегән һәрбер кешегә “Бишектән алып ләхеткә чаклы белем алу фарыз”. “Мин бит Коръән укый белмим”, дип акланырга ярамый, һәр кеше кириллица хәрефләре белән язылган 5-6 Коръән сүрәсе генә өйрәнә ала.
Нинди генә күренекле эшмәкәр имам “Коръәнне башка кешеләр өчен тутырырга ярый”, дип әйтүләренә карамастан, берүк ышанып алдана күрмәгез газиз милләттәшләр! Пәйгамбәребез (с.г.в.) үзенең әти-әнисе өчен Коръән чыккан булыр иде. Сәхабәләр арасында да андый хәлләр булмады...
“Һәр кешенең эшләгән эшләрен үз муенына чорнап куйдык, вә кыямәт көнне һәр кешегә үзенең гамәлләре язылган китабын ачык хәлендә аңа бирербез”. (17. 13.) Бер кешенең дә гамәл дәфтәренә “Аңа фәлән кеше Коръән тутырып багышлаган иде”, дип язылмый. Шуның өчен һәр кеше җәннәтне дә, тәмугны да үз гамәлләре белән кәсеп итә.