Англия патшасы Һенрих V турында чыккан яңа кинофильм - "The King" - кичә Netflix стримингында чыкты. Яшь патша ролен Тимоти Шаламе башкара. Шуңа да фильм Шаламеча килеп чыккан. Асылда, төп тема - кичә дуслары белән лыкынганчы эчеп йөргән һәм вакытын күңел ачуга багышлаган (монысы Шекспирның ялганы), шул ук вакытта "пацифист" булган егетнең ир-атка әверелүе, уйнак шаһзадә булудан туктап, чын патша статусын кабул итүе турында. Шаламеның күп рольләре әлегә "coming-of-age-story". "Патша" фильмы да шул юнәлешне дәвам итә.
Тәхет хуҗасының ялгызлыгы да чагылыш таба фильмда. Бигрәк тә эчке һәм тышкы сугышлар дәверендә хаким кешенең ышанычлы кешеләре аз була. Ә инде син мыек та үстермәгән яшь патша булсаң, һәр кешедән этлек көт тә тор.
Тимоти Шаламе, заманабызның даһи яшь актерларының берсе буларак, бу кинотасмага да сихри ямь бирә. Яшь патша тыныч тавыш белән җитди һәм катгый карарлар кабул итә. Тынычлык булуын тели, аны изгелек дәрәҗәсендә күрә, ләкин кирәк дип санаган чагында гаепсезләрне корбан итүдән тайчынмый. Шаламе - үзе дә үсеп килүче, балалык белән олылык арасында торучы егет. Шуңа да бу рольне нәкъ менә ул башкарырга тиеш иде.
Шекспирның берничә пьесасы нигезендә төшерелгән бу фильм матур килеп чыккан. Натурализм да юк түгел. Сугыш эпизодларында пычракта ауный-ауный сугышучы инглизләр һәм французлар күренеше; авыр-авыр хәрби киемле ирләр арасында, шул лайда шуышучы ябык, тәненә ит кунмаган патша - боларга карагач, Урта гасыр бәрелешләренә хас романтиканы онытасың. Ә инде Роберт Паттинсонның кылануларын күргәч, ни көләргә, ни еларга белмисең. Персонажыннан җирәнә башлыйсың, валлаһи.
Фильмның бер үзенчәлеге бар. Кем өчендер ул кимчелек тә булып тоелыр. Башыннан ахырына кадәр ниндидер гаҗәеп зур вакыйганы көтәсең. Азенкур буендагы бәрелешне шул вакыйга дип уйлыйсың, әмма ул да андый ук булып чыкмый. Мөгаен, иң монда хикмәт конкрет вакыйгада түгел, ә процессның үзендәдер.
Карарга тәкъдим итәм.