Bugun shirinliklarga boy kun bo'ldi. Bekajonlar sizlarga ajoyib tort retseptini ilindim. Taqdim etiladigan tort Ispaniya oshxonasining mashhur tortlaridan biridir. Aslo havotirlanishga hojat yo'q. Tayyorlanishi esa juda ham oddiy. Bekajonlar tort retseptini albatta saqlab qolishingizni maslahat beraman. Sababi ushbu tort sizga juda ham ma'qul bo'lishi turgan gap.
Kerakli masalliqlar:
- 50 gramm saryog'
- 500 ml qatiq
- 150 gramm un
- 50 gr+100 gramm shakar (krem uchun)
- 1 osh qoshiq kakao kukuni
- 1 chimdim tuz
- 200 ml qaymoq
- 100 gramm maskarpone
- 300 gramm qulupnay
- 1 choy qoshiq qabartma
Tayyorlash usuli:
1. Saryog'ni eriting, venchik yordamida kakao kukuni, shakar va tuz bilan ko'pirtiring.
2. Xona haroratidagi qatiq, un va qabartmani soling. Bir xil massa hosil bo'lgunga qadar aralashtiring.
3. Quruq, qizigan tovada blinchik-pankeyklarni pishiring. Pufakchalar paydo bo'lishi bilanoq ikkinchi tomoniga aylantiring.
4. Tayyor pankeyklarni sovuting.
5. Qaymoqni shakar va maskarpone bilan birga, yengil, ko'pik holigacha ko'pirtiring.
6. Qulupnayni tozalang va bo'laklarga bo'ling. 2 dona bezash uchun qoldiring.
7. Pankeykning birini krem bilan surting va qulupnay donachalaridan tering. Qolgan pankeyk, krem va qulupnay bilan shu holni takrorlab, tortni yig'ing.
8. Tayyor tort ustini hohishga ko'ra bezating. Tortni 1-2 soatga muzlatgichga joylang. Mazali tort tayyor!
Yoqimli ishtaxa!