Bekajonlar shoshiling! Bugun ko'pchilikning sevimli taomlaridan bo'lmish - dimlama taomini tayyorladim. Bu retsept barcha pazandalarni xursand qilishi aniq. Sabzavotlarning sharbatiga to'yingan bu taom biz o'ylaganingizdanda mazaliroq chiqdi. Siz ham tayyorlab ko'ring va baho bering.
Mana bu dimlama uchun solingan qo'y go'shtining oyoq qismi. Go'shtni harid qilganingizda qassobdan itimos qilsangiz bo'laklarga bo'lib beradi. Tayyorlashga qulay bo'ladi.
Kerakli masalliqlar:
1 dona qo'y go'shti oyoq qismi
4 dona piyoz
3 dona sabzi
10-13 dona mayda hajmdagi pomidor
2 dona bexi (nordon olma navi bilan almashtirishingiz ham mumkin)
2-3 dona bulg'or qalampiri
Ta'bga ko'ra kartoshka
2 sarimsoq boshi
1-2 dona achchiq quritilgan qalampir
Ta'bga ko'ra tuz, murch va ziravorlar
O'simlik yog'i yoki qo'y go'shti yog'i
Tayyorlash usuli:
1. Birinchi navbatda kerakli masalliqlarni tayyorlab oling. Go'shtni ortiqcha yog' qismlarini kesib tashlang. Sabzavotlarni tozalang va yuving. Pomidorning po'stini archib tashlang.
2. Qozonni qizdiring, o'simlik yoki qo'y go'shti yog'ini solib, qizdiring. Go'sht bo'laklarini qizartirib qovuring.
3. Tuz, murch va ziravorlarni soling. To'rg'algan piyoz va sabzini go'sht bilan yuzlashtiring.
4. Ha demay go'sht va piyoz sharbat ajratishni boshlaydi. Baland olovda dimlang. Piyoz yumshoq holga kelgandan so'ng, pomidorni soling. Pomidor ham yumshoq bo'lguncha jamlangan masalliqlarni birgalikda tayyorlang. Qarang qancha bulyon hosil bo'ldi.
5. Navbat sarimsoq boshi va qalampirga yetib keldi. Ularning ketidan kartoshka va bulg'or qalampirini soling. Agar siz bexi solishni ma'qul ko'rgan bo'lsangiz u holda kartoshka bilan birga soling. Bordiyu olma solishga qaror qilgan bo'lsangiz u holda taom tayyor bo'lishiga 30 daqiqa qolganda soling. Ta'bga ko'ra tuz soling va 1-3 stakan suv quying. Olovni past darajaga tushuring va 1-1,5 soat mabaynida dimlamani dimlab qo'ying.
6. Belgilangan vaqt o'tib, xonadoningizga tarqalgan yoqimli ifor taom tayyorligidan dalolat beradi. Yaqinlaringiz ham dasturxon davrasiga jam bo'lishdi. Taomni darhol suzing!
Yoqimli ishtaxa!