Aziz bekajonlar ushbu retsept asosida tayyorlangan pirog mehnat talab qilmaydigan, vaqtingiz ziqligida sizni saqlab qolish uchun ajoyib alternativa bo'ladi. Ushbu pirog hech qanday murakkab krem, shirin dekor va murakkab biskvit tayyorlash jarayonlarini talab qilmaydi. Shu bilan birga tayyorlangan pirog nozik, mazali va jozibador bo'lib chiqadi. Ushbu pirog hattoki bayram dasturxonida ham e'tiborga sazovor bo'lishi turgan gap.
Kerakli masalliqlar:
- 4 dona tuxum
- 150 gramm un
- 140 gramm shakar
- 1/2 choy qoshiq qabartma
- 10 gramm vanilin shakari
Asosiga:
- 200 gramm smetana
- 50 gramm shakar
- 5-6 bo'lak shaftoli (konservalangan)
- 1-2 osh qoshiq shakar kukuni
Tayyorlash usuli:
1. Shakar va vanilin shakarini tuxum bilan birlashtiring. Mikserning o'rta tezligida 4-5 daqiqa davomida ko'pirtiring. Shakar-tuxumli massa bir xil va quyuq, hajmiga nisbatan ko'payishi lozim.
2. Un va qabartmani aralashtiring. 3-4 qismga bo'lgan holda tuxumli massaga qo'shing. Har unli massani solganingizdan so'ng, pastdan tepaga, bir xil teksturada aralashtiring.
3. Diametri 22 sm bo'lgan qolipning tag qismiga pergament qog'ozi, qolipning devorlarini esa ozgina yog' bilan surting. Tayyorlangan xamirni quying va bir ikki marotabaga qolipni silkitib qo'ying. Xamir bir tekisda bo'lishi uchun. Biskvitni 180 darajada qizdirilgan pechda 25-30 daqiqa pishiring. Biskvit tayyorligini tish pichog'i yoki gugurt cho'pisi bilan tekshiring. So'ng, biskvitni sovuting va qolipdan ajratib oling.
4. Tayyor biskvitning ustki qismini yupqa qilib kesing, ichki qismini kovak qilib ajratib oling. Biroq, bu jarayonni extiyotkorlik bilan bajaring, biskvitning tag qismi va devorlari butunligicha saqlanib qolishi lozim.
5. Kremni tayyorlashga kirishing. Smetana va shakarni birlashtiring, bir xil, shakar erigunga qadar ko'pirtiring.
6. Biskvitning ajratib olingan ichki qismini bo'laklarga bo'ling va smetanali kremga soling. Aralashtiring.
7. Shaftoli bo'laklarini bir qismini yupqa, parrak shaklda kesing va kremga birlashtiring. Krem yanada mazali bo'lishi uchun 2 osh qoshiq shaftoli sharbatidan quying.
8. Tayyorlangan biskvit savatchasini shaftoli sharbati bilan shimdiring (2-3 osh qoshiq sharbat). So'ng, smetanali kremni soling va tekislang.
9. Qolgan shaftoli bo'laklari va biskvitning kesib olingan ustki qismini hohishingizga ko'ra bo'laklarga bo'ling. Smetanali krem ustiga bezagan holda shaftoli va biskvit bo'lagi aralashmasini terib chiqing. Tayyorlash jarayonini shakar kukuni sepgan holda yakuniga yetkazing. Pirogni 30 daqiqaga muzlatgichga olib qo'ying. Pirog tayyor!
Yoqimli ishtaxa!