Bugun sizlar uchun birinchi marotaba gruzin oshxonasining sevimli salatini tayyorlab, taqdim etishni lozim deb topdim. Tbilisi salati-juda ham to'yimli va mazali salatlardan biri. Salat tayyorlanishi oson, biroq kerakli masalliqlarni esa diqqat bilan tanlash lozim. Nega deysizmi? Bordiyu loviyaning ta'mi o'ziga xos bo'lmagan turini tanlasangiz salatning ta'mi o'zgaradi. Shuningdek, yong'oqni ham diqqat bilan tanlang, muddati o'tib ketgan yong'oq tanlab qo'ysangiz salatning ta'mi kutilgan natijani sizga taqdim etmaydi.
Kerakli masalliqlar:
250-300 gramm qaynatilgan mol go'shti (suyaksiz)
1 dona qizil bulg'or qalampiri
50 gramm yong'oq
1-2 dona sarimsoq tishchasi
Qizil loviya konservasi
0,5 bog' kashnuch
Qizil piyoz
O'simlik yog'i, tuz, xmeli-suneli ziravori
Salat uchun balzamli krem
Tayyorlash usuli:
1. Birinchi navbatda yong'oqni qizdirilgan, quruq tovada qovurib oling.
2. Yong'oq tayyor bo'lgunga qadar loviyani suvidan ajratib, suvda chayqab oling. Salat idishiga soling, loviya ustiga yarimhalqa shaklida kesilgan piyozni soling.
3. Yong'oq maromiga yetib tayyor bo'lgan bo'lsa, olovdan oling va pichoq yordamida maydalang. So'ng, navbati kelgunga qadar chetga oling.
4. Qizil bulg'or qalampirini tozalang, yuving. O'rtacha kattalikda to'rg'ang. Salat idishidagi masalliqlar bilan birlashtiring.
5. Sarimsoq tishchalarini tozalang va mayda-mayda to'rg'ang, bulg'or qalampiri ketidan idishga soling.
6. Endi navbat go'shtga yetib keldi. Go'shtni ham bo'laklarga bo'ling va qolgan masalliqlar bilan uchrashtiring.
7. Salat uchun sousni tayyorlang. Buning uchun: o'simlik yog'i va balzamli kremni birlashtiring va aralashtiring.
8. Sousni salatga quying, tuz, xmeli-suneli ziravori, yong'oq va maydalangan ko'katni soling. Ushbu bosqichda salatning ta'mi sharbatli, shirin-nordon bo'lganligini tatib ko'ring. Ta'bga ko'ra sousdan yana quyishingiz mumkin.
9. Salatni aralashtirganingizdan so'ng 30 daqiqaga qoldiring. Bu juda ham muhim. Salatni qancha uzoq vaqtga qoldirsangiz, masalliqlar bir-biri bilan kirishib, yanada mazali bo'ladi. Salat tayyor!
Yoqimli ishtaxa!