Bugun etiboringizga venetsiya xalqining sevimli va juda ham mazali bo'lgan salati retseptini taqdim etamiz. Ushbu salat uchun kerakli masalliqlar deyarli barcha bekalarning oshxonasidan topilishi turgan gap. Juda ham yengil, dasturxon davrasida barchaga ma'qul keladigan salatlardan biridir.
Kerakli masalliqlar:
- 500 gramm tovuq go'shti (filesi)
- 3 dona tuxum
- 2 dona kartoshka
- 200 gramm shampinon
- 2 dona bodring
- 200 gramm qattiq turdagi pishloq
- 200 gramm qora olxo'ri qoqisi
- Mayonez
- Ta'bga ko'ra tuz va murch
Tayyorlash bosqichlari:
Tovuq go'shtini yuving va suvda, tuz solib pishiring. So'ng, maydalab to'rg'ang.
Shuningdek tuxumni suvda, butunlay tayyor bo'lgunga qadar pishiring va mayda bo'laklarga bo'ling.
Kartoshkani po'sti bilan birga tuz solingan suvda pishiring. So'ng tozalang va to'rtburchak shaklda to'rg'ang.
Qora olxo'ri qoqisini yuving va oshxona sochig'ida quriting. Mayda-mayda bo'laklarga bo'ling.
Yuvilgan qo'ziqorinlarni esa parrak shaklda to'rg'ang. So'ng, tovada qizdirilgan, o'simlik yog'ida, tilla tusga kirgunga qadar qovuring.
Bodringni uzunligi bo'ylab, somoncha shaklda to'rg'ang.
Pishloqni qirg'ichning katta tomonidan chiqaring.
Salat uchun masalliqlarni tayyorlab oldik. Endigi bosqichda salatni yig'ishni boshlaymiz. Salat tayyorlaydigan idishga tag qismi ochiq, yumaloq qolipni qo'ying va qolip yordamida salatni yig'ishni boshlang. Ushbu usul bilan tayyorlangan salat yanada go'zal va ishtaxa ochar ko'rinadi. Birinchi navbatda kartoshkani soling va mayonez bilan surting.
Qora olxo'ri qoqisini soling. Biroq, mayonez surta ko'rmang.
Tovuq go'shtini soling va mayonez surting.
Tuxumni soling.
Qovurilgan, mazali shampinonlarni soling va mayonez bilan surting.
Salatning eng ustki qismiga navbat yetdi. Qirg'ichdan chiqarilgan pishloqni seping va extiyotkorlik bilan qolipni oling. Salatning ustki qismini bodring bo'laklari bilan bezating. Hohishingizga ko'ra bodringni pishloq va shampinon orasiga solishingiz ham mumkin. Mazali salat tayyor!
Yoqimli ishtaxa!