Taqdim etiladigan salatni tayyorlash jarayoni juda ham oddiy bo'lib, kerakli masalliqlar esa har bir bekaning muzlatgichidan topilishi turgan gap. Ushbu salat mazali bo'lish bilan birga sizda unutilmas taassurot qoldiradi. Tayyorlangan salat kundalik taom dasturxoni va bayram dasturxonlari uchun mos keladi.
Kerakli masalliqlar:
- 200 gramm tovuq go'shti (filesi)
- 1-2 dona bodring
- 100 gramm pishloq
- 3 dona tuxum
- 3-4 osh qoshiq mayonez (smetana yoki yogurt bilan almashtirish ham mumkin)
- 1-2 dona tuzlangan yoki marinadlangan bodring
- 2 choy qoshiq o'simlik yog'i
- 2 osh qoshiq un
- 5-10 gramm ko'kat (bezash uchun)
Tayyorlash usuli:
1. Birinchi navbatda tuxumni pishirishga qo'ying. 5-10 daqiqa davomida tuxumni pishiring. So'ng, 2-3 daqiqa sovuq suvda ushlab turing.
2. Tuxum tayyor bo'lgunga qadar tovuq go'shtini 2x2 sm shaklda bo'laklarga bo'ling. Tog'orachaga soling, un soling va bo'laklarni unga bulang. Ta'bga ko'ra tuz va murch solishingiz mumkin.
3. Tovada qizdirilgan yog'da tovuq go'shti bo'laklarini, tilla, qarsildoq holda kelguncha qovuring. Aslo qopqoq ostida qovura ko'rmang. Aks holda kutilgan natijaga erisha olmaysiz. Ta'bga ko'ra maydalangan sarimsoq solib qovurishingiz ham mumkin. Sarimsoq hushbo'y ifor va hushta'mlik bag'ishlaydi.
4. Bodringni po'stidan ajrating. Pishloqni 1x1 sm shaklda to'rg'ang. Salat tayyorlanadigan tog'orachaga pishloq, somoncha to'rg'algan bodring, tuzlangan bodringni soling.
5. Pishirilgan tuxumni to'rtburchak shaklda to'rg'ang.
6. Tayyor tovuq go'shtini oshxona sochig'iga oling, ortiqcha yog'i ajralishi uchun. So'ng, barcha masalliqlarni birlashtiring.
7. Mayonez yoki smetanani soling, ta'bga ko'ra tuz soling va aralashtiring. Dasturxonga tortishdan avval ko'kat bilan bezating.
Yoqimli ishtaxa!