ФӘҮЗИЯ БӘЙРӘМОВА
Минем телем!
Минем телем – Алтын Урда теле!
Ханнар теле, гавәм-галәм теле!
Дошманнарын кырган оран теле,
Дуслар өчен кылган дога теле –
Татар теле!
Минем телем – кара урман теле,
Татар аты үткән дала теле!
Бишек җыры, күкрәк сөте аша
Милләтемә сеңгән Ана теле –
Татар теле!
Минем телем – данлы дастан теле,
Тарих теле, бөек белем теле!
Бар җиһанга мәгърифәт тараткан
Мәктәп теле, изге гыйлем теле –
Татар теле!
Минем телем – шанлы Казан теле,
Бәйсез дәүләт теле, ирек теле!
Минем телем – бары Җиңү теле!
Тәкъдирдән бирелгән Язмыш теле,
Дөньялыкта мәңгелекнең үзе –
Татар теле!!!
Анам теле!
Милләт теле!
Фәүзия Бәйрәмова,
2019 ел, 14 апрель.