24 март Бөтендөнья туберкулезга каршы көрәш көне буларак билгеләп үтелә. Бу очраклы түгел. Әлеге зәһәр авыру ел саен җир шарындагы 2 миллионга якын кешенең гомерен өзә. Әлеге авыру, дөньяда булган җитди проблемаларның берсе булып тора.
Сәламәтлек саклау идарәсе начальнигы Вера Головина белдерүенчә, узган ел шәһәр һәм районда 65 кешедә туберкулез авыруы теркәлгән. Алар арасында 33 кеше табибка үзе мөрәҗәгать итеп, авыруын вакытында ачыклый алган. Хәзерге вакытта үпкә авыруы белән сукбайлар, төрмәдә утыручылар, тәртипсез тормыш алып баручылар гына авырый дигән сүз дөреслеккә туры килми. Чөнки авыру җенескә дә, вазифага да карамый. Ул бары тик кешенең иммунитетыннан, яшәү рәвешеннән генә тора.
Үпкә авыруы сөйләшкән, ютәлләгән, төчкергән вакытта авырудан сәламәт кешегә күчәргә мөмкин. Бөтендөнья сәламәтлек саклау оешмасы мәгълүматларына караганда, дөнья халкының өчтән бер өлешендә диярлек латент үпкә авыруы бар, ягъни алар әлеге бактерияләр белән зарарланганнар, әмма әлегә шушы авыру белән авырмаганнар. Әмма дөрес тукланмау, стресс, шулай ук иммунитетлары көчле булмаган кешеләр авыруга бирешергә мөмкин, ягъни туберкулез таякчыклары канга эләгә һәм төрле органнарда җыелып, авыруны китереп чыгара. Кеше үзенең авыруын белмәскә дә мөмкин, шуңа күрә дөрес диагнозны бары тик флюорография, манту яисә лаборатор методлар ярдәмендә генә белергә була.
- Хәзерге вакытта авырулар Казан, Түбән Кама һәм Лениногорск шә-һәрләрендәге туберкулез диспансерларына җибәрелә. Дәвалану иртә диагностика вакытында, организмның саклану көче бозылмаганда нәтиҗәле. Бу очракта дәвалану өчен озак вакыт дару препаратлары кабул итү таләп ителми, - ди Әлмәт туберкулезга каршы диспансер бүлеге мөдире Фәрит Шәнгәрәев.
Туберкулезга каршы көрәшне һәрбер кеше үзеннән башларга тиеш. Иң беренче чиратта сәламәт яшәү рәвеше алып барырга, спорт белән шөгыльләнергә, күбрәк саф һавада йөрергә, дөрес тукланырга, ял итәргә, гомумән, үз-үзеңне, организмыңны бар яклап та кайгыртырга киңәш ителә.
Аның өчен эшкә алынучы хезмәткәрләр, белем бирү оешмаларында, хастаханәләрдә, кибетләрдә эшләүчеләр, кыскасы, турыдан-туры халык белән аралашучылар ел саен флюорографик тикшеренү үтәргә тиеш.
Хәзерге ыгы-зыгылы, стресслар белән тулы заманда авыруларны кисәтергә, аларга юл куймаска, үз сәламәтлегеңне кайгыртырга кирәк. Моннан үзегезгә дә, якыннарыгызга да һәм бөтен илгә дә яхшырак кына булачак.
Ләйсән ХӘЙРУЛЛИНА
Башка яңалыклар белән безнең сайтта таныша аласыз.
Безгә язылырга онытмагыз - https://zen.yandex.ru