Күзләрем күптән мондый матур тамаша күрмәгәндер. Netflix чыгарган өр-яңа «Love, Death & Robots» сериалы иң әүвәл күзгә ләззәт бирә. Төсләр, стилистика, хәрәкәт — болары барысы да гаҗәеп нәфислек белән иҗат ителгән. Шәп графика һәм «тәмле» анимация мәңге истә калырлык визуаль хатирә калдыра. Эчтәлеге дә үзенчәлекле булганга күрә, һәрбер эпизодны сәер төш күргән кебек карыйсың.
❤️☠️🤖 — әйдәгез iguides.ru'дагыча шундый кыскартма кулланыйк — мөстәкыйль сюжетлы 18 кыска эпизодтан торучы антология. Мәхәббәт белән роботлар һәрберсендә очрамый, шуңа күрә сериалны хисле технологияләр турында дип уйламагыз. Гомумиләштерүче күренеш, әлбәттә, үлем. Теге яки бу формада (цивилизациянең юкка чыгуы, сугыш, табигый үлем, һөҗүмнәр һ.б.) ул һәр эпизодта очрый. Сериал, Black Mirror сыман, киләчәк турында да түгел. Кайбер серияләрдә чыннан да, якындагы яки ерактагы киләчәк белән очрашсак та, безгә шул ук вакытта альтернатив юлдан киткән стимпанк Кытайга яки хәзерге Әфганстанга һәм хәтта совет чорындагы Себергә дә «барырга» туры киләчәк.
Эпизодларны теләсә нинди тәртиптә карый аласыз. Аларның һәркайсы кич утырганда чәй эчкәндә ишеткән хикәят сыман. Ләкин кайберләрен кабат һәм кабат ишетәсе килә, ә «Good Hunting» яки «A Secret War» кебек эпизодларны аерым кинофильм яки хәтта сериал рәвешендә күрәсе килә башлый.
Табигый, мондый кызыклы проектта социаль һәм фәлсәфи проблемнар да күтәрелмичә калмый. Гәрчә авторлар андый максат куймаган булсалар да, хәзерге мәдәният продукты өстәмә мәгънә һәм астмәгънәсез яши алмыйдыр ул. ❤️☠️🤖 беренче эпизодында ук бүгенге көндә актуаль темага кереп китә һәм хатын-кыз объективациясе проблемасы һәм феминизм белән аваздаш булып чыга. Әлбәттә, экология, планетаның киләчәге, кешелекнең киләчәге турында сораулар да күтәрелә.
Фәлсәфи тирәнлек ягыннан иң төпкә төшә алган эпизод — 14 нче, «Zima Blue» дип аталганы. Дөресен әйтим, нәкъ шул серия аркасында бу антологияне карый башлаган идем. «Zima Blue» эпизоды иң югары үсешкә ирешкән акылның, Галәмдә мәгънәләр эзли торгач, бик гади хакыйкатьне төшенүе һәм иң гади халәткә кайтуы турында бәян итә. Каһарманның соңгы фразасы истә калды:
<…> unmake myself, leaving just enough to appreciate my surroundings to extract some simple pleasure from the execution of a task well done. My search for truth is finished at last. I'm going home.
Бәлки, яшәү мәгънәсе чыннан да үз бурычыңны төгәл башкарудан канәгать була алудадыр?
«Мәхәббәт, Үлем һәм Роботлар» һәркемнең күңеленә үтеп керәчәк дип уйлыйм. Карагыз, үкенмәссез. Әмма яшь чикләре турында (18+) онытмагыз.