Тропарь: Яко благочестиваго корене пречестная отрасль был еси, блаженне Александре, яви бо тя Христос, яко некое Божественное сокровище, Российской земли нового чудотворца, преславна и благоприятна. И днесь сошедшеся в память твою верою и любовию, во псолмах пениих радующеся славим Господа, давшаго тебе благодать исцелений, Его же моли спасти град сей, и державе Российской богоугодной быть, и сыновом Российским спастися.
Молитва: Скорый помощниче всех усердно к тебе прибегающих и теплый наш пред Господом предстатель, святый благоверный княже Александре! Призри милостивно на ны, недостойныя, многими беззаконии непотребны себе сотворшия, к иконе твоей ныне притекающия и из глубины сердца к тебе взывающия: ты в житии своем ревнитель и защитник Православныя веры был еси, и нас в ней тёплыми твоими молитвами непоколебимы утверди. Ты великое возложенное на тя служение тщательно проходил еси, и нас твоею помощью пребывать коегождо, в неже призван есть, настави. Ты, победив полки супостатов, от пределов Российских отгнал еси, и на нас ополчающихся всех видимых и невидимых врагов низложи. Ты, оставив тленный венец царства земного, избрал еси безмолвное житие, и ныне, праведно венцем нетленным увенчанный, на Небесех царствуеши, исходотайствуй и нам, смиренно молим тя, житие тихое и безмятежное и к Вечному Царствию шествие неуклонное твоим предстательством устрой нам. Предстоя же со всеми святыми Престолу Божию, молися о всех православных христианах, да сохранит их Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога, в Троице Святей славимаго Отца и Сына и Святого Духа, ныне и присно и во веки веков. Аминь.
